Կանադայի խորհրդարանի պատգամավոր Թոնի Քլեմենթը կոչ է արել իր երկրի կառավարությանը թույլ չտալ Արցախի տարածաշրջանում հակամարտության սրում:
«Բնականաբար, մարդու իրավունքների խախտման բազմաթիվ օրինակներ կան, որոնք արժանի են հիշատակության, բայց ես կցանկանայի շեշտել մարդու իրավունքների հետ կապված իրավիճակը Արցախի Հանրապետությունում կամ Լեռնային Ղարաբաղում»,- ասել է պատգամավորը խորհրդարանում իր ելույթում:
Նա նշել է, որ տարածաշրջան է այցելել ամռանը և առաջին ձեռքից ուսումնասիրել այնտեղ տիրող իրավիճակը և մարդու իրավունքների խախտումները «մարդկանց նկատմամբ, որոնք պարզապես ցանկանում են ապրել խաղաղ»: «Մենք հանդիպել ենք մայրերի, որոնք կորցրել են իրենց որդիներին, զինծառայողների և հակամարտության մեջ ներգրավված այլ մարդկանց: Ես գտնվում էի աննկարագրելի սարսափի տեսարանների մի կողմում»,- ասել է պատգամավորը:
Նա հույս է հայտնել, որ հնարավոր է տեսնել խաղաղ ու բարգավաճ Արցախ, որտեղ մարդիկ կողք կողքի կարող են ապրել իրենց հարևանների, այդ թվում՝ ադրբեջանցիների հետ:
Պատգամավորը նաև հիշեցրել է, որ Արցախի կարգավորման հարցը լուծվում է ԵԱՀԿ միջնորդությամբ, որտեղ Կանադան լիարժեք անդամ է:
«Ես կոչ եմ անում կառավարությանը դատապարտել մարդու իրավունքների ոտնահարումները տարածաշրջանում և աշխատանքներ տանել հակամարտության հետագա սրումը կանխելու համար»,- եզրափակել է Քլեմենթը:
Պատրաստեց Վիկտորյա ԱՆԴՐԵԱՍՅԱՆԸ