«Սարի թաղում ցուցարարները քարեր, շշեր, փայտեր են նետել մեր ուղղությամբ». վկա ոստիկաններ

Ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբին օժանդակելու եւ 2016թ. հուլիսի 29-ին զանգվածային անկարգություններ կազմակերպելու մեջ մեղադրվող ընդդիմադիր քաղաքական գործիչ Անդրիաս Ղուկասյանի գործով հերթական դատական նիստում այսօր որպես վկա ցուցմունք տվեց ոստիկան Ժիրայր Սարգսյանը, որը դատարանին հայտնեց՝ ծառայություն է կատարել Որմնադիրներ-Գլինկա փողոցների հատման վայրում:

Նրա պատմելով՝ աղմուկ են լսել Սարի թաղի վերեւի հատվածից, որտեղից քաղաքացիները՝ երթի մասնակիցները, քարեր են նետել. «Նույնիսկ մեզ էին քարերը հասնում: Շիշ, փայտ էին շպրտում: Մեր միջեւ ոստիկանների մեկ այլ ջոկատ կար, որը մեզանից վերեւ էր»:

Անդրիաս Ղուկասյանին առնչվող գործողությունների մասին, սակայն, Ժիրայր Սարգսյանը դատարանին ոչինչ չհայտնեց՝ միայն նշեց, որ Ղուկասյանին չի էլ տեսել: Նա չհիշեց, թե արդյո՞ք երթի մասնակիցները փորձել են ճեղքել ոստիկանական շարքերը:

Մյուս վկան՝ ոստիկան Կարեն Հունանյանը եւս պատմեց, որ քաղաքացիները ոստիկանների ուղղությամբ շշեր ու քարեր են նետել: Հունանյանը տեղեկացրեց, որ քաղաքացիների են բերման ենթարկել, որովհետեւ վերջիններս բղավում էին:

Նրա բացատրությունը զարմացրեց Անդրիաս Ղուկասյանի շահերի պաշտպան Կարեն Մեժլումյանին: Նրա հարցերին ի պատասխան վկան այդպես էլ չկարողացավ հստակեցնել, թե ինչ խախտման համար էին ցուցարարներին բերման ենթարկել:

Լուիզա ՍՈՒՔԻԱՍՅԱՆ