«ՀՀ-ԵՄ համաձայնագրի կարեւոր առաքելություններից մեկը տարածաշրջանային կայունությանը նպաստելն է, ինչը հնարավոր չէ, եթե համաձայնագրի լեգիտիմացումը չիրականանա ազգային խորհրդարանների կողմից: Համաձայնագիրն ունի անցումային դրույթներ եւ այն պետք է վավերացվի բոլոր՝ 28 անդամների կողմից»,-«Կոնրադ Ադենաուեր» հիմնադրամի՝ այսօր Երեւանում կազմակերպած քննարկման ժամանակ անդրադառնալով նոյեմբերին ՀՀ-ի եւ ԵՄ-ի միջեւ ստորագրված Ընդլայնված եւ համապարփակ գործընկերության համաձայնագրին, ասաց ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը:
Նրա բնորոշմամբ՝ ոչ ԵՄ-ն, եւ ոչ էլ Ռուսաստանն աշխարհատնտեսական եւ աշխարհաքաղաքական կոնֆլիկտի ռեսուրս այլեւս չունեն. «Որքան երկար է տեւում ՌԴ-ԵՄ առճակատումը, այնքան շահում են Ասիան եւ ԱՄՆ-ն: Ռուսաստանի եւ Եվրոպայի իշխող էլիտայի մոտ արդեն ձեւավորվում է մետածելակերպ, որը գործընթացը պետք է վերադարձնել իր հունի մեջ»:
Արմեն Աշոտյանի համոզմամբ՝ Գերմանիայի պես հզոր պետությունը պետք է ստանձնի «շոգեքարշի՞ դեր՝ ՀՀ-ի եվրոպական իղձերի կատարման ճանապարհին, քանի որ Գերմանիայի խոսքին ականջալուր են. «Հայաստանի եվրոպական պատմության հաջողության գրավականներից մեկն այն է, որ Եվրոպան պետք է շարժիչ ուժեր ունենա նաեւ ազգային պետությունների մակարդակով: Հուսամ՝ այդ ուժերից մեկը կլինի Ֆրանսիան, բայց այս պահի դրությամբ ԵՄ-ի հաջող ընթացքի եւ ՀՀ-ի հետ գործակցության համար Գերմանիան անփոխարինելի նշանակություն ունի»:
Լուիզա ՍՈՒՔԻԱՍՅԱՆ
