Սաթիկ Սեյրանյանն ընտրվեց Ժուռնալիստների միության նախագահ՝ թեժ մթնոլորտում (Տեսանյութ)

Սաթիկ Սեյրանյանն ընտրվեց Ժուռնալիստների միության նախագահ՝ թեժ մթնոլորտում (Տեսանյութ)

Այսօր Ժուռնալիստների միության համագումարն էր եւ միության 40 տարվա նախագահ Աստղիկ Գեւորգյանը, որը պաշտոնավարում էր 1977-ից հրաժեշտ տվեց միությանը: Ընտրվեց նոր նախագահ՝ Սաթիկ Սեյրանյանը:

Թե ինչ մթնոլորտում անցավ համագումարը, ինչ վիճաբանություններով ու խառնաշփոթ միջավայրում, նույնիսկ բարդ է նկարագրել, տեսանյութերից ավելի պարզ կլինի:

Նախ, Աստղիկ Գեւորգյանն ասաց, որ արել է միության համար «ինչ հնարավոր է»: Նա մաղթեց, որ նորընտիր վարչությունը անի այն, ինչ իրենք չեն կարողացել անել:

Նա ասաց, որ առանց բամբասանքների, առանց խայթոցների մթնոլորտ է ստեղծվել ժուռնալիստների միությունում եւ դա ամենակարեւորն է: Աստղիկ Գեւորգյանը չընդունեց քննադատությունը, որ ժուռնալիստների միությունը բոլոր մյուս միություններից ամենապասիվն է եղել, ասաց, որ սկզբում իրենք էլ էին ակտիվ, ասուլիսներ էին կազմակերպում, վերապատրաստման կուրսեր անում, ԶԼՄ-ների մասին օրենսդրական դաշտի վրա աշխատում: Աստղիկ Գեւորգյան ասաց, որ հիմա ժամանակն է հանգստի անցնել: Նա առաջարկեց միության նոր նախագահի թեկնածուների քվեարկությունը կազմակերպել: Լավրենտի Միրզոյանը հակադարձեց, թե այս ի՞նչ համագումար է: Նախ` պետք է նորմալ 12-րդ համագումար հրավիրել, օրակարգ սահմանել. «Լրագրողները մի տեղ օրենքի խախտում են տեսնում, բարձրաձայնում են, ո՞նց կարող է այսպես…Վարչություն չկա, արդեն լսում ենք Աստղիկ Արսենովնայի հաշվետվությունը, մանդատ չունենք, հիմա պետք է ձե՞ռք բարձրացնենք՝ կողմ ենք, թե դեմ, կանոնադրություն պետք է պահվի»:

Ըստ նրա, հիմա ձեւի համար կարող են ասել՝ համագումար անցկացրեցինք, բայց որեւէ մեկը չի ասում՝ «ինչո՞ւ մենք մեր հարկի տակ չենք, Գրողների միությունում ենք, երբ Ժուռնալիստների միությանը 3 հատ շենք է տրամադրվել , այդ շենքը ո՞վ վաճառեց, արենդայով տվեցին, թե ինչ…»:

Միրզոյանը հորդորեց, որ օրինական համագումար անեն: Նրան չլսեցին, Միրզոյանն էլ բաճկոնը վերցրեց ու հայտարարեց, որ հեռանում է: Դահլիճը սկսեց աղմկել, ոչ ոք ոչ մեկին չէր լսում, միջամտեց ՀՀԿ պատգամավոր Մարգարիտ Եսայանը, նա առաջարկեց միության նոր նախագահ ընտրել արագ, քանի որ դահլիճը կարճ ժամանակով են վերցրել:

Հակոբ Մարտունին հայտարարեց. «Խոսում եք Հայաստանի ժուռնալիստների միության մասին, ականջները էլ մի երկարացրեք, այն այլեւս հանգուցյալ է 40 տարի, հողի տակ է, փտած է, չկա: Եկեք հենց հիմա առաջարկություն անենք, նոր ժուռնալիստների միություն պետք է ստեղծվի, արտաշիրիմումը չի փրկի: Նոր միություն է անհրաժեշտ: Էլի ինչ մեկուկես ժամ, Լավրենտ հասկացի, դա մեռած ա, չկա այս միությունը, դեռեւս Գորբաչովի ժամանակ թաղվել է: Եթե մեկը կա, որ լավ լրագրող է, կազմակերպչական ջիղով, եկեք ընտրենք, ինչ եք բոհեմիստական բաներ անում: Բարի գիշեր, Կոնդի ղշեր»:

Մեկը տեղից բղավում էր, թե արագացրեք, ընտրենք գնանք, մյուսը գոռում էր, թե ամեն ինչ պետք է լինի օրենքով, կանոնադրությամբ, հերթով, կարգով, հիշում էր, որ 40 տարի է՝ համագումար չեն արել: Աստղիկ Գեւորգյանը հոգոց էր հանում, թե ինչ լավ է, այս ամենից հեռանում է: Մեկը հիշեց, որ հայտնի ժուռնալիստները երբ մեռնում են, թաղմանը 10 հոգի է գնում, ՀԴԿ նախագահ Արամ Սարգսյանը միջամտեց, թե մեռելներից ինչի՞ եք խոսում, ձեզ կոռեկտ պահեք, ոչ ոք չի պատրաստվում մեռնել: Բոլորը բոլորի հետ վիճում էին, չկար բարձրախոս անգամ, որ բեմում խոսացող մարդուն լսեին: Իսկ բեմում ներկայացվում էր հաշվետվություն, թե այսքան դրամով վերապատրաստում ենք արել, այսքան դրամով գերազանցիկ ուսանողներին այս ենք արել եւ այլն: Դահլիճից գոռում էին՝ չենք լսում, ավարտի գնա:

Համագումար կոչվող այս «միջոցառման» մանրամասները՝ ավելի ուշ:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (1)

Պատասխանել

  1. Մանվել says:

    Անկազմակերպ կազմակերպություն . Էլ Ձեր գրածներին ոնց հավատանք

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք