Վերջին օրերին Իրանում շարունակվող հակակառավարական ցույցերի հետևանքով զոհվել է 12 մարդ: Այս մասին հայտնում է BBC-ն՝ վկայակոչելով երկրի պետական հեռուստաալիքը:
Իրանական ԶԼՄ-ները չեն հստակեցնում՝ երբ և որտեղ են եղել զոհերը: Ավելի վաղ հաղորդվում էր 6 զոհերի մասին, նրանցից երկուսը՝ երկրի հարավ-արևմուտքում:
Բողոքի ցույցերը շարունակվել են նաև հունվարի 1-ի գիշերը՝ չնայած երկրի նախագահ Հասան Ռուհանիի ուղերձին: Վերջինս իր ելույթում հայտարարել էր, որ ակցիայի ընթացքում իրենք բռնություն թույլ չեն տա:
Այնուամենայնիվ, բռնությունից խուսափել չի հաջողվել: Ոստիկանությունը Թեհրանի Էնքելաբ հրապարակում ցույցը ցրելու համար կիրառել է արցունքաբեր գազ և ջրցաններ: Խոշոր ակցիաներ են տեղի ունեցել Քերմանշահում, Խորեմաբադում, Շեհինշեհրում և Զենջանում:
Բացի այդ, վերջին մի քանի օրում, ընդհանուր առմամբ ձերբակալվել է շուրջ 400 մարդ:
Իշխանությունները երկրում արգելափակել են սոցցանցերի (այդ թվում Telegram-ի և Instagram-ի) որոշ հաշիվներ, որոնք, նրանց կարծիքով, օգտագործվում են ցույցեր կազմակերպելու համար:
Ցույցերին մասնակցում են հիմնականում երիտասարդ տղամարդիկ, որոնք պահանջում ե հոգևոր վարչակարգի տապալում: Ընդ որում, ընդդիմության ակտիվ ներկայություն այս ցույցերում չի նկատվում:
Որոշ ցուցարարներ պահանջում են վերադարձնել շահական վարչակարգը, իսկ ԱՄՆ-ում ապրող Իրանի նախկին շահ Ռեզա Փեհլևիի որդին հայտարարություն է տարածել՝ ի աջակցություն ակցիայի մասնակիցների:
Պատրաստեց՝ Վիկտորյա ԱՆԴՐԵԱՍՅԱՆԸ
