Սահմանամերձ Բերդից բուժակը 1990-ականների կռիվներից մնացած 15 փամփուշտի համար դատապարտվել է

Սահմանամերձ Բերդից բուժակը 1990-ականների կռիվներից մնացած 15 փամփուշտի համար դատապարտվել է

Հունվարի 8-ին Տավուշի մարզի առաջին ատյանի դատարանի Բերդի նստավայրում կայացել է Բերդ քաղաքի 49-ամյա բնակիչ Վրեժ Աթոյանի դատավարությունը: Նրան մեղադրանք է առաջադրվել այն բանի համար, որ 1990-ական թվականներից Բերդ քաղաքում գտնվող իր առանձնատանն ապօրինի կերպով պահել է ընդհանուր թվով 15 հատ գործարանային արտադրության 9 մմ տրամաչափի ռազմամթերք հանդիսացող մարտական փամփուշտներ: Նրան մեղադրանք է առաջադրվել ՀՀ քրեական օրենսգրքի 235 հոդվածի 1-ին մասով («Ապօրինի կերպով հրազեն, բացի ողորկափող հրազենից եւ դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը»): Սույն հոդվածը որպես պատիժ նախատեսում է առավելագույնը 3 ամիս ժամկետով կալանք կամ առավելագույնը 3 տարի ժամկետով ազատազրկում: Վ. Աթոյանի նկատմամբ խափանման միջոց է ընտրվել չհեռանալու մասին ստորագրությունը:

Վ. Աթոյանը մասնակցել է 1990-ական թվականների մարտական գործողություններին, որպես բուժակ սահմանագծում է եղել, սակայն ազատամարտին նրա մասնակցության վերաբերյալ փաստաթղթեր չկան: Նա Հայաստանի որսորդմիության անդամ է , որսորդմիության ներկայացուցիչը ոստիկանության աշխատողի հետ այցելել է նրա տուն, որպեսզի տեսնեն վերջինիս որսորդական զենքի պահպանման պայմանները, ոստիկանության աշխատակիցը նկատել է պատուհանի գոգին դրված, նշված փամփուշտները:

Տավուշի մարզի առաջին ատյանի դատարանի դատավոր Զոյա Զաքինյանը հունվարի 8-ին վճռել է Վ. Աթոյանին մեղավոր ճանաչել նրան առաջադրված հոդվածով, նրան դատապարտել մեկ ամիս ժամկետով կալանքի, ՀՀ քրեական օրենսգրքի 70 հոդվածի կիրառմամբ պատիժը պայմանականորեն չկիրառել, նշանակել մեկ տարի ժամկետով փորձաշրջան:

Ոսկան ՍԱՐԳՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք