«Ողջունելի է այն փաստը, որ ԵՏՄ ինտեգրացիոն գործընթացներին զուգահեռ՝ Հայաստանը փորձում է զարգացնել գործակցությունը նաեւ Եվրոպական միության հետ: Այլ է հարցը, թե հայկական կողմը որքանով կկարողանա իր համար տնտեսական օգուտներ քաղել համաձայնագրից»,-Aravot.am-ի հետ զրույցում անդրադառնալով նոյեմբերին ՀՀ-ի եւ ԵՄ-ի միջեւ ստորագրված Ընդլայնված եւ համապարփակ գործընկերության համաձայնագրին, ասում է «Նորավանք» գիտակրթական հիմնադրամի վերլուծաբան, քաղաքագետ Կարեն Վերանյանը:
«Որոշակի քաղաքական մտավախություններ կան՝ արդյո՞ք համաձայնագիրը որեւէ կերպ խոչընդոտ չի հանդիսանա ԵՏՄ ինտեգրացիոն գործընթացների հետ համադրության առումով: Այս հարցում վերապահումներ կան. արդեն տեսնում ենք, որ հայկական ապրանքների արտահանման հետ կապված խնդիրներ կան մասնավորապես Ռուսաստանի պարագայում: Կարծում եմ՝ սա քաղաքական հարց է»,-նշեց նա:
Կարեն Վերանյանի խոսքով՝ այլ է հարցը՝ նման խնդիրը Ռուսաստանի պաշտոնակա՞ն մոտեցումն է, թե այդ երկրում որոշակի խմորումների հետեւանք է. «Խոսքը ՌԴ-ի ներսում արտաքին ազդակների դրսեւորումների մասին է: Չի բացառվում, որ այս ամենում թուրքական եւ ադրբեջանական հետք կա: Հայտնի է, որ ՌԴ որոշ շրջանակներ սերտորեն գործակցում են Ադրբեջանի հետ»:
Մանրամասն ՝ տեսանյութում:
Լուիզա ՍՈՒՔԻԱՍՅԱՆ
