ԱՄՆ պետքարտուղարությունը Հայաստանը ներառել է ճամփորդության համար անվտանգ երկրների ցանկում: Միաժամանակ, գերատեսչությունը զգուշացրել է իր քաղաքացիներին զերծ մնալ Արցախ այցելություններից՝ այնտեղ ընթացող հակամարտության պատճառով:
Զբոսաշրջիկների համար այլ երկրների անվտանգության նոր համակարգը տեղադրվել է Պետքարտուղարության կայքում:
Աշխարհի բոլոր երկրները բաժանվել են 4 դասակարգերի՝ ըստ անվտանգության: Առաջին դասակարգը ենթադրում է «Նախազգուշական բավականին սովորական միջոցներ», երկրորդը՝ «Մեծ զգուշության ցուցաբերում», երրորդ՝ «Վերանայե՛ք այդ երկիր այցելելու ձեր որոշումը», չորրորդ՝ «Մի՛ այցելեք այդ երկիր»: Բաժանումը պայմանական է և կրում է խորհրդատվական, ոչ թե պարտադիր բնույթ:
Հայաստանը ներառվել է առաջին դասակարգում այնպիսի եվրոպական երկրների հետ, ինչպիսիք են Ավստրիան, Կանադան, Շվեյցարիան, սկանդինավյան և արևելաեվրոպական երկրները, հետխորհրդային գրեթե բոլոր երկրները (բացառությամբ՝ Ադրբեջանի, Ուկրաինայի և Ռուսաստանի):
Երկրորդ կատեգորիայում, որը ենթադրում է բարձր նախազգուշական միջոցառումներ, ներառված են եվրոպական այնպիսի երկրներ, ինչպիսիք են Գերմանիան, Մեծ Բրիտանիան, Ֆրանսիան: Նույն կատեգորիայում է ներառված նաև Ադրբեջանը և Արցախի տարածքը (քարտեզում Արցախը ներառված է Ադրբեջանի կազմում և որպես առանձին միավոր դիտարկված չէ):
Ռուսաստանը հայտնվել է երրորդ կատեգորիայում, քանի որ այդ երկրում պահպանվում է ահաբեկչության վտանգը, ԱՄՆ քաղաքացիները հաճախ ենթարկվում են տարբեր հետապնդումների: Նույն կատեգորիայում են նաև Թուրքիան, Պակիստանը, Վենեսուելան, Կուբան և այլն:
Պատրաստեց՝ Վիկտորյա ԱՆԴՐԵԱՍՅԱՆԸ
