«Տեսակետ» ակումբում անդրադառնալով հունվարին կայանալիք ՀՀ եւ Ադրբեջանի արտաքին գործերի նախարարներ Էդուարդ Նալբանդյանի եւ Էլմար Մամեդյարովի հանդիպմանը` ադրբեջանագետ Տաթեւիկ Հայրապետյանը այն կարեւորեց այնքանով, որ նրա խոսքով, նման հանդիպումների ժամանակ բացառվում է պատերազմական գործողությունների վերսկսման վտանգը:
Ինչ վերաբերում է 2018-ի հոկտեմբերին Ադրբեջանում կայանալիք նախագահական ընտրություններին, ադրբեջանագետը նշեց, որ ներկլանային վերադասավորումներ են նկատվում, հատկապես Ալիեւայի եւ Փաշաեւների կլաններն են ավելի ազդեցիկ են դառնում, իսկ նախիջեւանյան կլանը շարունակում է վերահսկել պաշտպանական ոլորտը:
«Ի դեպ, Մեհրիբան Ալիեւան ավելի արեւմտամետ գործիչ է ընկալվում, քանի որ նրա աշխատակազմը հիմնականում համալրված է արտերկրում կրթություն ստացած երիտասարդներով»,-ընդգծեց նա:
Նաեւ հավելեց, որ այս տարվա նախագահական ընտրությունների արդյունքում Ադրբեջանի նախագահ ընտրվողը արդեն ոչ թե հինգ, այլ յոթ տարի է պաշտոնավարելու:
Տաթեւիկ Հայրապետյանը նաեւ անդրադարձավ ԵԽԽՎ-ի Ադրբեջանի պատվիրակության փոփոխությանը, ասելով, որ պատվիրակությունից երկու հոգի հեռացվել է, քանի որ ԵԽ-ում սկսել են զգուշավոր մոտենալ Ադրբեջանի լոբբինգին:
Գոհար ՀԱԿՈԲՅԱՆ
