Երեւանում կանաչ տարածքներն այնքան քիչ են, հատկապես կենտրոնում, որ որեւէ այգի պաստառապատված տեսնելիս կամ անգամ բարեկարգման աշխատանքների հանդիպելիս միանգամից վատն ենք մտածում: Այս օրերին ծայրից ծայր փակված է Մյասնիկյանի արձանի հետնամասում գտնվող Իտալիայի, Բեյրութի, Խորենացու եւ Գ. Լուսավորչի փողոցների սահմաններով պարփակված այգին: Քաղաքացիների մտքով ինչ ասես անցնում է` զվարճանքի վայր է կառուցվում, ռեստորան կամ սրճարան, ինչպես որ այլ այգիների պարագայում է եղել:
«Այգում կարգելվի որեւէ առեւտրային գործունեության իրականացումը»,-«Առավոտին» վստահեցրին Երեւանի քաղաքապետարանից: Ասացին նաեւ, որ այգին բարեկարգվում է Երեւան քաղաքի հիմնադրման 2800-ամյակի առիթով: Այդ որոշումը կայացվել է անցյալ տարվա դեկտեմբերի 26-ի ավագանու նիստում: Համաձայն ավագանու որոշման՝ այգին կբարեկարգվի բարեգործական միջոցներով, եւ այդ աշխատանքներից բացի՝ բարեգործը պատրաստակամություն է հայտնել նաեւ հետագա տարիներին իր միջոցների հաշվին իրականացնել այգու շատրվանների ինժեներական եւ տեխնիկական սպասարկումը, սարքավորումների խոտանման դեպքում՝ դրանց վերականգնումը, փոխարինումը նորով, վնասված սալիկների փոխարինումը եւ վերանորոգումը, ինչպես նաեւ կանաչ գոտիների խնամքն ու սպասարկումը:
Լուսանկարը` ԼՈՒՍԻՆԵ ԲՈՒԴԱՂՅԱՆԻ
«Առավոտ»
13.01.2018
