Այսօր ԱԺ հայտարարությունների ժամին «Ելք» խմբակցության պատգամավոր Արարատ Միրզոյանն անդրադարձավ թանկացումներին եւ կոչ արեց մարդկանց մասնակցել իրենց կազմակերպած երթին: Նա ասաց, որ եթե բողոքում են թանկացումներից, դա կարող են անել ոչ թե ֆեյսբուքում, տանը՝ բազմոցին նստած, ավելի լավ է գնան կինո «Մոսկվայի» հարակից հրապարակ:
Թանկացումներից բողոքեց եւ իշխանություններին քննադատեց նաեւ «Ծառուկյան» խմբակցության պատգամավոր Կարինե Պողոսյանը: Նա ասաց, որ ամանորյա երազներից նոր արթնացած քաղաքացիները կանգնեցին դառը իրականության առջեւ: Պատգամավորը նշեց, որ շուտով օրակարգ կբերեն տրանսպորտի ուղեվարձի թանկացման հարցը. «Իրավիճակը միանշանակ զգալի ազդեցություն կունենա գնողունակության անկման վրա, աղքատության շեմի բարձրացման վրա, ինչն էլ կնպաստի արտագաղթի ավելացմանը»: Նա խոսեց նաեւ սպեկուլյատիվ թանկացումներին, անբարեխիղճ տնտեսվարողներին:
Պատգամավորն ասաց, որ իշխանությունները պետք է որոշակի քայլեր արդեն ձեռնարկած լինեին՝ գնաճը զսպելու համար. «Շատերը այնպիսի զարմանալի հանգստությամբ են խոսում այս համատարած թանկացումների մասին, ասես մեր երկրում կենսամակարդակն այնքան բարձր է, որ քաղաքացու գրպանի վրա չնչին ազդեցություն է ունենալու: Սա արդեն գերծանր բեռ է եւ լուրջ վտանգներ է պարունակում»:
Հռիփսիմե ՋԵԲԵՋՅԱՆ
