Հունվարի 16-ին տեղի է ունեցել ԿԳ նախարարության նոր ձեւավորվող տեսչության կառավարման խորհրդի նիստը, որի տեսչության պետի տեղակալների ընտրությունն էր: Կրթության տեսչության մարմնի ղեկավար Ալեքսանդր Շագաֆյանը ներկայացրել է երկու հոգու թեկնածություն` Արթուր Ավագյանի եւ դաշնակցական Նաիրի Սաղաթելյանի, որը աշխատել է որպես ԿԳ նախարարության տեսչության պետի տեղակալ: Կառավարման խորհուրդը վեց «դեմ»-ով եւ մեկ «կողմ»-ով նրանց հաստատել է: Նրանք այլեւս կրթության տեսչության պետի տեղակալներ են:
«Դեմ» է քվեարկել միայն կրթության փորձագետ Անահիտ Բախշյանը: «Ներկայացվեցին երկուսի կենսագրությունը: Անձամբ ես «դեմ» եմ քվեարկել երկուսին էլ եւ ասել եմ, որ չեմ վստահում այդ մարդկանց, որովհետեւ Սաղաթելյան Նարիրին լուծարված տեսչության պետի տեղակալն էր եւ ես տեսել եմ իր գործունեությունը: Ասացի, որ փաստեր ունեմ հավաքած, հարցեր տվեցի եւ պարզունակ պատասխաններ ստացա, որոնք պատշաճ չէին կրթության տեսչության պետի տեղակալին: Մյուսը Արթուր Ավագյանն է, որի կենսագրության մեջ գրված է, որ գյուղատնտեսական ակադեմիան է ավարտել, մեքենաներ, սարքավորումներ բաժինը, այնուհետեւ կառավարման ակադեմիան, այս պահին Բրյուսովի համալսարանի խորհրդի անդամ է եւ ֆինանսական հարցերով պրոռեկտոր, աշխատել է ծրագրերի իրականացման գրասենյակում, ծրագրերի մեծ մասն էլ գյուղատնտեսական ոլորտին են վերաբերվում, միայն մեկը նախադպրոցական կրթությանը:
Ասացի, որ նախադպրոցական կրթությանը վերաբերող ծրագիրը պատշաճ ձեւով չի իրականացվել: Նրանից եւս հիմնավորված պատասխաններ չստացա իմ տված հարցերին: Ասացի տեղյա՞կ է կրթության ոլորտի օրենսդրական, իրավական դաշտին, ասաց` կսովորեմ: Այստեղ են ասել` բարեւ ձեզ…Չէ՞ որ տեսչությունների կոնցեպցիան պահանջում է մասնագիտական լուրջ կարողություններ եւ հմտություններ, մինչդեռ երկու թեկնածուների դեպքում էլ այդ կարողություններն ու հմտությունները կասկածելի են: Դրա համար էլ «դեմ» եմ քվեարկել»,- Aravot.am-ի հետ զրույցում ասաց Անահիտ Բախշյանը: Նա գտնում է, որ վերջիններս աչք են փակել կոռուպցիոն եւ նման այլ երեւույթների վրա:
Հավելենք, որ Արթուր Ավագյանը ՀՀԿ գործադիր մարմնի անդամ, ՀՀԿ երիտասարդական կազմակերպության նախագահ, ՀՀ ԱԺ պատգամավոր Կարեն Ավագյանի եղբայրն է: Ինչ վերաբերում է Նաիրի Սաղաթելյանին, նա դեռեւս մագիստրատուրայում սովորելու տարիներին ԿԳՆ կրթության տեսչությունում առաջին կարգի մասնագետ է եղել:
Գոհար ՀԱԿՈԲՅԱՆ
«Նրանք այլեւս կրթության տեսչության պետի տեղակալներ են»:
Հարգելի Գոհար Հակոբյան, «այլևս»-ը կիրառվում է ժխտման դեպքում: Օրինակ՝ «այլևս տեղեկալներ չեն»:Ձեր նախադասության «այլևս» ը փոխարինեք «այսուհետ»ով կամ ավելի ճիշտ կլինը ընդհանրապես դեն գցեք:
Հարգելի Ալեքսանդր, շնորհակալություն խորհրդի համար