Տավուշի մարզի առաջին ատյանի դատարանում ընթանում է Սամվել Այվազյանի դատավարությունը: Նրան մեղադրանք է առաջադրվել այն բանի համար, որ նա 2017թ. օգոստոսի 3-ին չունենալով ՀՀ պահպանվող պետական սահմանը հատելու իրավունք վերապահող սահմանված փաստաթղթեր եւ պատշաճ թույլտվություն, ՀՀ պետական սահմանն ապօրինի հատելու դիտավորությամբ, օգտագործելով իր կողմից կեղծ կնիքով ու դրոշմակնիքով կնքված, Վարդգես Ալոյանի տվյալներով ՀՀ քաղաքացու կեղծ անձնագիր, փորձել է ապօրինի հատել ՀՀ պահպանվող պետական սահմանը, սակայն իր կամքից անկախ հանգամանքներում հանցագործությունն ավարտին չի հասցրել:
Նրան մեղադրանք է առաջադրվել ՀՀ քրեական օրենսգրքի 325 հոդվածի 1-ին մասով («Իրավունք վերապահող կամ պատասխանատվությունից ազատող վկայական կամ պաշտոնական այլ փաստաթուղթ կեղծելը՝ կեղծողի կողմից անձամբ կամ այլ անձի կողմից դրանք օգտագործելու կամ իրացնելու նպատակով կամ այդպիսի փաստաթուղթ իրացնելը կամ նույն նպատակներով կեղծ կնիքներ, դրոշմներ, ձեւաթղթեր, տրանսպորտային միջոցների հաշվառման համարանիշներ պատրաստելը կամ իրացնելը, ինչպես նաև ակնհայտ կեղծ փաստաթուղթ օգտագործելը») եւ 34-329 հոդվածի 1-ին մասով(«Առանց սահմանված փաստաթղթերի կամ առանց պատշաճ թույլտվության Հայաստանի Հանրապետության պահպանվող պետական սահմանը հատելու փորձը»):
Ս. Այվազյանը կալանավորված է: Նրա դատավարության հերթական նիստը Տավուշի մարզի առաջին ատյանի դատարանում կայացել է հունվարի 11-ին:
Ոսկան ՍԱՐԳՍՅԱՆ
