«Մտահոգություն ունեմ, որ մարդիկ շատ են մտածում այդ մասին»,-ԱԺ-ում այսօր լրագրողների հետ զրույցում անդրադառնալով թանկացումներին՝ ասաց ՀՀԿ խմբակցության պատգամավոր Գալուստ Սահակյանը: «Բայց նաեւ լավ ճանաչում եմ ժողովրդին եւ գիտեմ, թե ինչ է վերջինիս ցանկությունը: Պարզապես ընդդիմությունն ուզում է իր տեսակետն առաջ տանել ու ինչ-որ կերպ արտահայտում է»,-համոզմունք հայտնեց նա: Լրագրողները հետաքրքրվեցին.
-Ո՞րն է ժողովրդի ցանկությունը:
-Որպեսզի էժանություն լինի, որպեսզի լավ ապրեն, կարողանան խանութներից օգտվեն:
-Այդ դեպքում, ինչո՞ւ է իշխանությունը ծանրացնում սոցիալական բեռը:
-Դա արդեն ընդդիմադիր խոսք եք ասում…իշխանությունից չէ, որ գնաճն ավելանում է: Ամբողջ աշխարհում էլ գնաճ կա: Ժողովրդի մի մաս կա, որ շատ ծանր է ապրում, ուստի 2,5 գնաճն էլ է մեծ բեռ: ԱԺ-ն շուտով լսումներ կկազմակերպի, կառավարությունն էլ պետք է լուծումներ առաջարկի:
-Սերժ Սարգսյանն ասաց՝ «պետք է ճշտել՝ թանկացումները ոմանց ագահությա՞ն արդյունքն են»: Ձեր կարծիքով՝ այդպե՞ս է:
-Ժողովուրդը պետք է հասկանա, որ այստեղ իշխանությունը եւ պետությունը կապ չունեն, բայց պետք է այնպիսի քայլեր մտածել, որ ժողովրդի խնդիրը լուծվի:
-Ո՞վ մտածի:
-Ժողովուրդը, իշխանությունը, պետությունը, բոլորս»,-եզրափակեց Գալուստ Սահակյանը:
Լուիզա ՍՈՒՔԻԱՍՅԱՆ
