Այսօր խորհրդարանում լրագրողները ՀՀԿ-ական պատգամավոր Հերմինե Նաղդալյանից հետաքրքրվեցին, թե ինչու է նա հեռացվել ԵԽԽՎ հայաստանյան պատվիրակության կազմից: Հիշեցնենք, որ նրան փոխարինելու է մեկ այլ ՀՀԿ-ական պատգամավոր Կարինե Աճեմյանը:
-Վիրավորված չէ՞ք Սերժ Սարգսյանից: Ասում են՝ նա անձամբ է ցանկացել, որ դուք հեռանաք:
-Ով որ այդպես ասել է՝ իրեն հարցրեք,-պատասխանեց Հերմինե Նաղդալյանը
-Վիրավորված չե՞ք:
-Ոչ:
-Այդ դեպքում, ո՞րն է հեռացման պատճառը:
-Երբ այս խորհրդարանն ընտրվեց, խորհրդարանի եւ նախագահի հետ պայմանավորվածություն եղավ, որ ԵԽԽՎ նոր պատվիրակության փորձառուներն ավելի երկար աշխատեն: Կարգն այնպիսին է, որ նոր խորհրդարանի պարագայում հին պատվիրակության անդամները վեց ամսով կարող են շարունակել իրենց աշխատանքը, քանի որ պատվիրակության նոր անդամների հետ փորձի փոխանակման անհրաժեշտություն կա: Իմ դեպքում անհանգստությունն ուզում եմ փարատել՝ ի սկզբանե պայմանավորվածություն եղավ, որ վեց ամսով շարունակելու եմ իմ աշխատանքը եւ վեց ամսից թողնելու եմ ԵԽԽՎ-ն:
-Կա՞ Արփինե Հովհաննիսյան-Հերմինե Նաղդալյան հակասություն:
-Ես հնարովի բաների մասին խոսելու նախասիրություն չունեմ եւ որեւէ մեկի հետ հակասություն չունեմ: Ես այն մարդկանցից չեմ, որոնք անձնական հարաբերությունները բերում են աշխատանքային դաշտ:
Լուիզա ՍՈՒՔԻԱՍՅԱՆ
