Լրահոս
Օրվա լրահոսը

Երթուղայինների ուղեվարձը չի թանկանա. Կառավարությունը հավաստիացնում է

Հունվար 17,2018 17:58

«Ծառուկյան» խմբակցության պատգամավոր Իվետա Տոնոյանը մեջբերելով վարչապետի խոսքերը, որ 2,6 տոկոս գնաճը սարսափելի չէ, այսօր ԱԺ-կառավարություն հարցուպատասխանի ժամանակ ասաց, որ սարսափելի է այն, որ մարդիկ Ամանորը նշելու համար վարկեր են վերցնում, կոմունալները վճարելու համար վարկեր են վերցնում: Նա հարցրեց՝ Սերժ Սարգսյանի մոտ խորհրդակցությունից անցել է մեկ շաբաթ, նա հանձնարարականներ էր տվել, ի՞նչ բացահայտումներ են տեղի ունեցել այս ընթացքում, հստակեցվե՞լ են տնտեսվարողների անունները, որոնք իրենց սեփական գրպանի համար այս ընթացքում հարստահարել են ժողովրդին:

Փոխվարչապետ Վաչե Գաբրիելյանը պատասխանեց, որ 2,6 տոկոսը սպառողական գների ինֆլյացիան է, այն ամբողջովին արտացոլում է մեր հասարակության սպառումը, լայն սպառման կենսապահովման առարկաները: Նա նշեց, որ մի շարք ապրանքատեսակների գծով էլ գնանկում կա. «Հավի թարմ միսը 22 տոկոսով իջել է, ձեթը՝ 5 տոկոսով, բարձր տեսակի ալյուրը՝ 6 տոկոսով, ոսպը՝ 37 տոկոսով, հնդկաձավարը՝ 52 տոկոսով, թթվասերը՝ 4 տոկոսով»:

Ինչ վերաբերում է հանձնարարականներին՝ Վաչե Գաբրիելյանն ասաց, որ ուսումնասիրություններ են արել, բոլոր ԱԳԼՃԿ-ները մոնիտորինգի են ենթարկվել եւ ընդամենը 7-ում 210 դրամի փոխարեն գազի սակագինը 220 դրամ է եղել: Որակի տեսչությունը ՏՄՊՊՀ-ին է փոխանցել տվյալները, այդ գները եւս իջեցվել են: Փոխվարչապետը վստահեցրեց, որ հարստահարում չի եղել:

Ուշագրավ է, որ ի տարբերություն շատ կանխատեսումների, Վաչե Գաբրիելյանը վստահեցրեց, որ դիզվառելիքի թանկացումը չի կարող բերել տրանսպորտի գնի թանկացմանը, ուղեվարձի բարձրացմանը, քանի որ ակցիզային հարկն իջել է, ԱԱՀ-ով հարկումով է փոխարինվել:

Ինչ վերաբերում է գազին, նա հիշեցրեց, որ մինչեւ 2015-ը տրանսպորտներն աշխատել են գազի այդ սակագնով եւ տեղավորվել են այդ գնի մեջ, ուստի գազի թանկացումն էլ որեւէ կերպ չի կարող հիմք հանդիսանալ ավելացնելու երթուղայինների ուղեվարձը:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հունվար 2018
Երկ Երե Չոր Հնգ Ուրբ Շաբ Կիր
« Դեկ   Փետ »
1234567
891011121314
15161718192021
22232425262728
293031