Թուրքիան Սիրիայի Աֆին քաղաքում փորձում է ապակայունացնել իրավիճակը, քանի որ այդտեղ միավորվում են բոլոր քրդական կառույցները, ինչից էլ խուսափում է Թուրքիան: Այս մասին այսօր «Պոստ Սկրիպտում» մամուլի ակումբում լրագրողների հետ զրույցում ասաց թուրքագետ-քրդագետ Կարեն Հովհաննիսյանը: Հիշեցնենք՝ օրերս Էրդողանը սպառնաց Աֆինի շրջանում Սիրիայի քրդերի դեմ գործողություններ սկսել, իսկ երեկ մի քանի հրթիռ արձակեց: Կարեն Հովհաննիսյանի խոսքով՝ հրթիռակոծությունը թիրախներ չուներ, պարզապես թուրքական կողմը ցանկացել է ցույց տալ, որ կարող է հարձակում գործել:
«Սկզբում Թուրքիան հայտարարեց, որ ռուսական ուժերը, որոնք հսկում են օդային տարածքը, դուրս են գալիս Աֆինից, եւ Թուրքիան պատրաստվում է հարձակման: Իրականում դա ապատեղեկատվություն էր: Ռուսական կողմը չի ողջունում Աֆինի վրա հնարավոր հարձակումը: ԱՄՆ-ն եւս կտրուկ է արձագանքում Թուրքիայի նման հայտարարություններին»,-նկատեց Կարեն Հովհաննիսյանը: Սիրիայում քրդական կառույցների ամրապնդմանը զուգահեռ, ինչպես փորձագետը նշեց, ակտիվացել են նաեւ Թուրքիայի քրդերը, որոնք վերջին շրջանում բացահայտ հարձակումներ են իրականացրել թուրքական ռազմակայանների վրա:
Ինչ վերաբերում է թուրք-քրդական այս հակամարտությունում հայության շահերին, Կարեն Հովհաննիսյանի խոսքով. «Քրդերը հավակնություններ ունեն Արեւմտյան Հայաստանի բոլոր տարածքների վրա, բայց մի շեշտում են, որ դա իրենց ընդհանուր հայրենիքն է: Նրանք չեն ժխտում, որ այդտեղ հայեր են ապրել, բայց մտածում են, որ դա քրդերի հայրենիքն է, որտեղ կարող են հայերի հետ ապրել: Սակայն քրդական ինքնիշխան կառույցների ստեղծումը բուն Արեւմտյան Հայաստանի տարածքում դեռ հնարավոր չէ, նախադրյալներ չկան»:
Լուիզա ՍՈՒՔԻԱՍՅԱՆ
