ՀՀ մարդու իրավունքների պաշտպան Արման Թաթոյանը հայտարարություն է տարածել, որով վստահեցնում է՝ Արայիկ Պապիկյանի հայտարարությունը, թե Պաշտպանը տևական ժամանակ չի արձագանքում իր պաշտպանյալ Արթուր Մովսիսյանի առողջական վիճակի վերաբերյալ բարձրացրած խնդրին, չի համապատասխանում իրականությանը:
Արման Թաթոյանը մասնավորապես գրել է. «Վարդաշեն» ՔԿՀ-ում գտնվող Արթուր Մովսիսյանի փաստաբան Արայիկ Պապիկյանի հունվարի 18-ի հայտարարությունը, թե ՀՀ մարդու իրավունքների պաշտպանը տևական ժամանակ չի արձագանքում իր պաշտպանյալի առողջական վիճակի վերաբերյալ բարձրացրած խնդրին, չի համապատասխանում իրականությանը:
Արայիկ Պապիկյանի դիմումն Արթուր Մովսիսյանի վերաբերյալ Մարդու իրավունքների պաշտպանի աշխատակազմը էլեկտրոնային փոստով ստացել է ոչ աշխատանքային օր՝ հունվարի 13-ին, որը մուտքագրվել է առաջին իսկ աշխատանքային օրը՝ հունվարի 15-ին: Դիմումի մուտքագրումից անմիջապես հետո ուսումնասիրվել են դրանում նշված հանգամանքները և, ըստ այդմ, անմիջապես աշխատանք է սկսվել ՀՀ ԱՆ քրեակատարողական վարչության հետ:
Մարդու իրավունքների պաշտպանի աշխատակազմի ներկայացուցիչները քրեակատարողական հիմնարկներ երեկվա այցի ընթացքում հանդիպել են նաև Արթուր Մովսիսյանին: Դրանից բացի Քրեակատարողական վարչության հետ աշխատանքի հիման վրա՝ երեկ արդեն իսկ նրան այցելել է համապատասխան բժիշկ, նախանշվել են համապատասխան բուժհետազոտություններ: Այս գործողությունների արդյունքների մասին Արայիկ Պապիկյանը գրավոր տեղեկացվել է:
Մարդու իրավունքների պաշտպանը մշտապես կարևորում է փաստաբանների հետ համատեղ աշխատանքը, նրանց դերն իրավունքների արդյունավետ պաշտպանության հարցում, սակայն հորդորում է զերծ մնալ իրականությանը չհամապատասխանող տեղեկատվության հրապարակումից՝ հաշվի առնելով նաև այն, որ աշխատակազմն աշխատում է գերծանրաբեռնվածությամբ: Տարեկան 6000-ից ավելի ստացվող բողոքների և դիմումների պայմաններում հնարավոր չէ կատարվող յուրաքանչյուր գործողության կամ ձեռնարկվող միջոցի վերաբերյալ հանդես գալ հրապարակային հայտարարությամբ»:
