Իրավիճակ (բանաստեղծություն)

Քայքայված երկիր, անտեր ժողովուրդ,

Մի շարք հարուստներ, մեռած բազմություն,

Երկիրը քանդող մի քանի խլուրդ,

Եվ կոկորդ սեղմող հիասթափություն:

Անհույս էակներ, դատարկ օջախներ,

Բանկերին գերի գրավառուներ,

Մոլորված այրեր, բյուր գործազուրկներ,

Զավակներ կորցրած անհավատ մայրեր:

Վախեցած աչքեր, զարմացած դեմքեր,

Զարմանահրաշ, ահարկու դեպքեր,

Ծռված մարմիններ, թախծոտ հայացքներ,

Նեղ փողկապներով անխիղճ ջահելներ:

Համարյա մեռած, պապիկ-տատիկներ,

Սպասման տենչից տառապող հարսներ,

Վախկոտ հայացքով բյուր մուրացկաններ,

Երկիրը պահող բազում աղքատներ:

Արյամբ շաղախված նորակառույցներ,

Եվ դրանք կրող գորշ թաղամասեր,

Վրեժով լցված շատ մահապարտներ,

Ուղեղը հալված բյուր թմրամոլներ:

Նայող՝ չտեսնող փլված հոգիներ,

Ականջը պարզած՝ չլսող որբեր,

Այգում գիշերող լի հարբեցողներ,

Կյանքի գծից դուրս գունատ կմախքներ:

Եվ ցերեկվա պես գիշեր անցկացնող

Անհույս պոռնիկներ, անամոթ լրբեր,

Ձեռքերը պարզած հոծ մուրացկաններ,

Խիղճը վաճառած լիքը ճարպիկներ:

Սնկի պես ծլած տարանուն բանկեր,

Օջախներ քանդող անխիղճ հարուստներ,

Երբեմնի տաղանդ՝ լիքը խելառներ,

Ամեն տասնյակում՝ իննը հիվանդներ:

Փողին խոնարհվող կեղծ նվիրյալներ,

Մարդկանց կեղեքող չար պաշտոնյաներ,

Այս արտագաղթին նպաստող անձեր,

Գերեզմանները ուրացող այրեր:

Եկեղեցիներ կառուցող այրեր,

Հավատն ուրացած մոլորյալ կույսեր,

Եվ բախտի բերմամբ հարստացածներ,

Հոգին վաճառած անհավատ լրբեր:

Հավատքը շահի վերածող անձեր,

Հոգեորսությամբ՝ հարստացողներ,

Սրբությունները ոտնահարողներ,

Միամիտ մարդկանց մոլորեցնողներ:

Աստծուց հեռացած «հավատացյալներ»,

Գաղթի ճամփեքին ծվարած հայրեր,

Եվ հարմար պահի սպասող գողեր,

Ուրիշին գռփող անհոգի այրեր:

Անհասկանալի իրավիճակներ,

Պաթոսով լեցուն անհույս պոռթկումներ,

Եվ բողոքավոր խճողված խմբեր,

Ու ոչինչ չասող անհասցե ճառեր:

Անկարողության անիմաստ ճիչեր,

Քաոս հիշեցնող անհեթեթ շարժեր,

Քամու պես սուրող ասեկոսեներ,

Ասելիքից զուրկ մերկ բամբասանքներ:

Խուլ տնքոցներով խորը հևոցներ,

Հավատը կորցրած դալուկ հայացքներ,

Վայրկյանով ապրող գունատ կմախքներ,

Կյանքից անտեղյակ զարմացած դեմքեր:

Շուտ ոգևորվող բյուր միամիտներ,

Եվ ոչինչ չասող անմիտ ելույթներ,

Արժեքներից զուրկ անբարո բարքեր,

Բռնապետական ահարկու կարգեր:

Դառն ալիքներով լեցուն քամիներ,

Անմեղ հայացքով լայն շերտ քծնողներ,

Սարսափ տարածող անսիրտ գազաններ,

Եվ կյանքեր խլող անխիղճ դահիճներ:

Ամեն մի մետրում բյուր դավաճաններ,

Խիղճը վաճառած մեծահարուստներ,

Ծնողին հանգիստ ծերանոց տանող

Պատվից հեռացած մեծ փողատերեր:

Արժեքներից զուրկ դատարկաբաններ,

Կերակրատաշտը պաշտող սողուններ,

Միշտ պատվից խոսող նենգ պատվազուրկներ,

Մարդ սնանկացնող հատուկ տեսակներ:

Ջրից վախեցող, միշտ լողից խոսող

Նամուսը կորցրած կեղծ երեսպաշտներ,

Ոչինչ չարարող, ամեն ինչ քանդող

Երկիր կործանող բյուր դավաճաններ:

Կեղծ խայծ գցողներ և խառնակիչներ,

Եվ ամեն հարցում ջուր պղտորողներ,

Սրբությունները հեշտ շրջանցողներ,

Ամեն ինչ ուտող, միշտ ուրացողներ:

Փողը մեծարող բազում էակներ,

Նյութը արժեքից միշտ վեր դասողներ,

Խոսքը հեշտ դրժող դատարկ վախկոտներ,

Եվ անբովանդակ ներկայացումներ:

Մարդկանց քանակից շատ մեքենաներ,

Սարսափելի խիտ դղյակաշարեր,

Նրանցից խլած և հենց նույն մարդկանց

Տոկոսով տրված արյունոտ փողեր:

Լրիվ ավերված կանաչ տարածքներ,

Նոր, վեր խոյացած բիզնես օբյեկտներ.

Արտասահմանյան ճոխ մեքենաներ,

Օրենքից վերև խումբ արտոնյալներ:

Անմահ խաղացող մոլորյալ խմբեր,

Քթները ցցած անմիտ էակներ,

Սեփական անձին խիստ սիրահարված

Արժեքներից զուրկ կույր փողամոլներ:

Կյանքի անխնա, ուժգին հարվածներ,

Անկարողությունից շփոթված անձեր,

Աշխատանք փնտրող բյուրավոր այրեր,

Տիրոջը լքած կորուսյալ մայրեր:

Ողջը թալանված՝ փակ գործարաններ,

Եվ աշխատանքով հրաշքներ գործած

Մուտքի դռան մոտ կախված նկարներ,

Նաև գործազուրկ աշխատակիցներ:

Վայրագ հողմեր են սուրում ամենուր,

Երերում հողը մեր ոտքերի տակ,

Եթե չսթափվենք ու դառնանք ամուր,

Կկորչենք անհետ ու հիմնահատակ…

Անանիա ՄԱՂԱՔՅԱՆ