Երեւանի հասարակական տրանսպորտի նոր ցանցի նախագիծը, որը հունվարի 18-ին ներկայացրեց փոխքաղաքապետ Վահե Նիկոյանը` բուռն քննարկումների տեղիք է տվել: Մարդկանց հետաքրքրում է` օրինակ` ինչպե՞ս են 18 մետրանոց կցորդով ավտոբուսները տեղաշարժվելու մայրաքաղաքում, բարեփոխումների արդյունքում որքանո՞վ է բարձրանալու տրանսպորտի ուղեվարձը, քանի՞ տրանսպորտ փոխելով են քաղաքացիները հասնելու «ա» կետից «բ» կետը եւ այլն:
Այսօր «Զարկերակ» մամուլի ակումբում «Սպառողների խորհրդատվական կենտրոն» հ/կ նախագահ Կարեն Չիլինգարյանը, որը նույնպես մասնակցել է նախագծի քննարկմանը, կարծիք հայտնեց, որ երթուղային նոր ցանցով քաղաքացիները կազատվեն «չարիք» դարձած «գազելներից»:
Այդուհանդերձ դեռ մի շարք հարցերի պատասխաններ պարոն Չիլինգարյանն էլ չի ստացել, մասնավորապես` որքանով է բարձրանալու ուղեվարձը: Պարոն Չիլինգարյանը նաեւ չգիտեր, թե «գծատեր» ով է լինելու, պետությո՞ւնը թե մասնավոր ներդրողը:
Aravot.am-ի այն հարցին, թե երթուղագծերը, որոնք տարիներ ի վեր պատկանել են որոշ օլիգարխների կամ պաշտոնյաների, արդյոք անցնելու են պետության վերահսկողության ներքո, սպառողների պաշտպանը պատասխանեց` այդ հարցերը դեռ հստակեցված չեն, նաեւ պարզ չէ` մեկ, թե մի քանի օպերատոր է լինելու:
Ըստ նրա, եթե մեկ օպերատոր եղավ, դա կնշանակի ամեն ինչի տերը նա է, իսկ տեր հասկացողությունը սխալ է:
Մանրամասները` տեսանյութում
Ըստ նախնական հաշվարկների, մայրաքաղաքի տրանսպորտային ցանցը բարեփոխելու համար կպահանջվի 100 միլիոն եվրո: Կկարողանա՞ արդյոք այդ գումարները հայթայթել կառավարությունը, դեռ պարզ չէ: Եթե գումարները չգտնվեն, ըստ Կարեն Չիլինգարյանի, միջազգային փորձագետին վճարած 800 հազար եվրոն ջուրը կլցվի. «Այդ դեպքում, քաղաքապետարանը պետք է հրաժարական տա ու դուրս գա»:
Հասարակական տրանսպորտի նոր ցանցի նախագիծը մշակել է WYG ընկերությունը: Թե ինչու հենց այս ընկերությանն է վստահվել այդ գործը, հարցին՝ քաղաքային իշխանությունները պատասխանել են, որ նրա տված նախագծերը հեղինակություն են վայելում եւ միջազգային կառույցներից ավելի հեշտ կլինի վարկեր ներգրավել ծրագիրն իրականացնելու համար:
Այն մտահոգություններին ի պատասխան, թե դժվար կլինի 18 մետրանոց ավտոբուսների տեղաշարժը, Կարեն Չիլինգարյանը կարծիք հայտնեց, որ «գազելների» բեռնաթափման դեպքում երթեւեկությունը, կանգառները զգալի կթեթեւանան: Բացի այդ, մայրաքաղաքի դժվար անցանելի տեղերում ներդրվելու են մինչեւ 50 տեղանոց ավտոբուսներ: Վարորդները կանգառից կանգառ են կանգնելու, քաղաքացիներն էլ «ա» կետից «բ» կետը հասնելու համար ստիպված չեն լինելու երկու-երեք տրանսպորտ փոխել եւ մի քանի հարյուր դրամ ծախսել: Ըստ նախնական հաշվարկների, բարեփոխման դեպքում, հասարակական տրանսպորտի եղած շարժակազմի քանակը երեք անգամ կրճատվելու է:
Հարցին, թե ավելի ճիշտ չէ՞ր լինի մետրոպոլիտենի կայարաններն ավելացնել, քանի որ տրանսպորտի հարցը պարբերաբար խնդիր է դառնում մայրաքաղաքի համար` ավտոմեքենաների քանակն ավելանալու պատճառով, Կարեն Չիլինգարյանը պատասխանեց, որ մետրոյի միայն մեկ կայարան կառուցելու համար անհրաժեշտ է 150 միլիոն դոլար:
Լուսինե ԲՈՒԴԱՂՅԱՆ
