ՀՀ վերաքննիչ քրեական դատարանն այսօր դատավորներ Մանուշակ Պետրոսյանի, Մխիթար Պապոյանի եւ Սեւակ Համբարձումյանի նախագահությամբ սկսեց Հայաստան «Իգլա» զենք տեղափոխելու եւ փողերի լվացման մեղադրանքով 6 տարվա ազատազրկման դատապարտված՝ ԼՂՀ ՊԲ նախկին հրամանատար Սամվել Բաբայանի վերաքննիչ բողոքի քննությունը: Նա, ինչպես նաեւ Սանասար Գաբրիելյանը եւ Արմեն Պողոսյանը պահանջում են բեկանել Կենտրոն եւ Նորք-Մարաշ վարչական շրջանների ընդհանուր իրավասության դատարանի որոշումը, որով իրենք մեղավոր են ճանաչվել;
Դատական նիստերի դահլիճ մտնելուն պես ամբաստանյալներից Սանասար Գաբրիելյանը, նայելով հատակին, հեգնեց՝ «էս ի՞նչ տրուբայա» (նկատի ունի «Իգլա»-ն.-խմբ.): Դատավորներից Մխիթար Պապոյանը նրան նկատողություն արեց, որ ոտքը ոտքին նստած է խոսում եւ դատարանին կանգնած չի դիմում: «Ի՞նչ անեմ, տրուբան ոտքիս խանգարեց»,-կրկին հեգնեց Սանասար Գաբրիելյանը:
Նա հայտարարեց, որ ինչպես եւ նախկինում, այժմ էլ պաշտպան չի ցանկանում ունենալ: «Ի՞նչ եմ արել, որ պաշտպանվեմ»,-ասաց նա:
Ապա Սամվել Բաբայանը դատախազ Արամ Արամյանի դեմ ինքնաբացարկի միջնորդություն ներկայացրեց, որը հիմնավորեց այսպես. «Նա իր մեղադրականում միտումնավոր չի ընդգրկել կարեւոր փաստերը: Ես կապացուցեմ ձեզ, որ նա խեղաթյուրել է փաստերը: Նա պատվեր է կատարում: Դատարանն էլ արտագրել է մեղադրողի գրածը: Նման մեղադրող չի կարող լինել»:
Սանասար Գաբրիելյանը, Արմեն Պողոսյանը միացան միջնորդությանը: Արամ Արամյանը հայտարարեց, որ միջնորդությունն ակնհայտ անհիմն է. «Ամբաստանյալների կողմից որեւէ իրավական հիմնավորում չնշվեց, որը միջնորդությունը բավարարելու հիմք կարող էր դառնալ: Զուրկ է հիմնավորումից այն պնդումը, թե մեղադրողը կողմնակալ է եղել»:
Դատավորները, վերադառնալով խորհրդակցական սենյակից, որոշեցին դատախազի դեմ ինքնաբացարկի միջնորդությունը մերժել: Իսկ դա նշանակում է, որ բողոքի քննության ընթացքում որպես մեղադրող-դատախազ շարունակելու է հանդես գալ Արամ Արամյանը:
Լուիզա ՍՈՒՔԻԱՍՅԱՆ
