Այսօր ԱԺ նախագահի նախաձեռնությամբ ԱԺ-ում «Առանձին ապրանքների գների բարձրացման պատճառները եւ գնաճը մեղմելու հնարավորությունները» թեմայով լսումներ են կազմակերպվել:
ԱԺ տնտեսական հարցերի հանձնաժողովի նախագահ Խոսրով Հարությունյանը ներկայացրեց ընթացակարգը, թե որքան ժամանակ է տրամադրվում հարցուպատասխանի, զեկույցների համար:
«Ելք» խմբակցության ղեկավար Նիկոլ Փաշինյանը, լսելով, որ Ազգային վիճծառայության պետ Ստեփան Մնացականյանին հարցեր տալու հնարավորություն չունեն, նա միայն տեղեկատվական հաղորդում է ներկայացնելու՝ դժգոհեց. «Առաջարկում եմ, որ հարցեր տրվեն, ամեն ինչ սկսում է այդտեղից»:
Խոսրով Հարությունյանը պարզաբանեց, որ օրենքով նա չի կարող ներքաշվել քաղաքական բանավեճերի մեջ, Փաշինյանն էլ արձագանքեց. «Ես չասացի նրան ներքաշեք քաղաքական դեբատների մեջ, թվեր են ներկայացվել, այդ թվերի հետ կապված հարցեր կան: Հիմա եթե ԱՎԾ պետը կհամարի, որ ինքը չպետք է ներքաշվի քաղաքական բանավեճի մեջ, թող չներքաշվի: Բա այս ամբողջ պատմությունն իրենց զեկույցներից է սկսվում եւ ավարտվում, եթե հարցեր պիտի չտանք…Այդ դեպքում ես առաջարկում եմ, որ ԱՎԾ պետը գնա իրա գործերին, որովհետեւ բոլորը իր զեկույցները կարդացել են, տառաճանաչ են, կարող են կարդալ: Կարդալու է այն, ինչ արդեն հրապարակվել է, մեթոդաբանությունն էլ է հրապարակված, եթե հարց չենք տալու, ինչի՞ համար ենք այդ մարդու ժամանակը խլում, թող գնա իր գործերին»:
Իսկ Վիճծառայության պետն իր զեկույցում ասաց, թե որ ապրանքատեսակներն են թանկացել. 2017-ի դեկտեմբերին նոյեմբերի համեմատ գրանցվել է 1,5 տոկոս գնաճ»: Նա նշեց, որ սպառման ապրանքները նախորդ տարվա համեմատ թանկացել են 2.1 տոկոսով, դրանցից սննդամթերքն ու ոչ ալկոհոլային խմիչքների գների աճել են 4,1 տոկոսով, 3.2 տոկոս գնաճ է եղել ծխախոտի դեպքում:
Հռիփսիմե ՋԵԲԵՋՅԱՆ
