Լրահոս
Օրվա լրահոսը

Դատվում է 15 հազար դրամի հավ ու 44 հազարի խոճկոր գողանալու համար

Հունվար 23,2018 16:23

Շիրակի մարզի ընդհանուր իրավասության դատարանում՝ դատավոր Աշոտ Մանուկյանի նախագահությամբ սկսվել է Աղին գյուղի անասնագոմերից գողություններ կատարելու մեջ մեղադրվող, ազգությամբ եզդի Յուսուֆ Քալաշյանի նկատմամբ հարուցված քրեական գործի քննությունը։ Վերջինս, լինելով գործազուրկ, իրեն կարծես գործ է ճարել․ Աղին գյուղի բնակիչներից մեկի անասնագոմից 44 հազար ՀՀ դրամ արժողությամբ երկու խոճկոր է տարել, նույն գյուղի մեկ այլ բնակչից էլ՝ 15 հազար դրամ արժողությամբ 5 հավ։ Վերջինս գողությունները կատարել է մեկ ամսվա տարբերությամբ․ օգոստոս ամսին գողացել է խոճկորները, սեպտեմբերին էլ՝ հավերը։

Ըստ մեղադրական եզրակացության,․ «Յուսուֆ Քալաշյանին մեղադրանք է առաջադրվել այն բանի համար, որ նա ուրիշի գույքի զգալի չափերով գաղտնի հափշտակություն կատարելու դիտավորությամբ 2017թ օգոստոս ամսին, մուտքի դռան փականը բացելու եղանակով ապօրինի մուտք է գործել ՇՄ Աղին գյուղի բնակիչ Հ.Տոնոյանի անասնագոմ և այնտեղից գողացել զգալի չափի` ընդհանուր 44.000 ՀՀ դրամ արժողության երկու խոճկոր:
Բացի այդ, Յ.Քալաշյանը 2017թ. սեպտեմբերի 21-ին, ժ.21:00-ին ,ապօրինի մուտք է գործել ՇՄ Աղին գյուղի բնակիչ Ա.Պետրոսյանի անասնագոմ և գողացել 15.000 ՀՀ դրամ արժողության թվով 5 հավ»:

Վերջինիս մեղադրանք է առաջադրվել ՀՀ Քրեական օրենսգրքի 177 հոդվածի 2-րդ մասի 3-րդ կետով Քրեական օրենսգրքի այդ հոդվածը, որը կոչվում է «Գողություն», սահմանում է․«Գողությունը, որը կատարվել է բնակարան, պահեստարան կամ շինություն ապօրինի մուտք գործելով, պատժվում է տուգանքով՝ նվազագույն աշխատավարձի երկուհարյուրապատիկից վեցհարյուրապատիկի չափով, կամ ազատազրկմամբ՝ երկուսից վեց տարի ժամկետով եւ տուգանքով նվազագույն աշխատավարձի առավելագույնը հիսնապատիկի չափով կամ առանց դրա»:

Յուզուֆ Քալաշյանի նկատմամբ որպես խափանման միջոց ընտրվել է ստորագրություն՝ չհեռանալու մասին, վերջինս նախկինում դատված չի եղել։

Նունե ԱՐԵՎՇԱՏՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հունվար 2018
Երկ Երե Չոր Հնգ Ուրբ Շաբ Կիր
« Դեկ   Փետ »
1234567
891011121314
15161718192021
22232425262728
293031