«Աֆրիկյան երկրներ կան, որտեղ իշխանությունները բառի բուն իմաստով կերել են ընդդիմությանը, շնորհակալությո՞ւն հայտնենք, որ մեզ չեք կերել»,- այսօր ԱԺ-ում թանկացումների մասին լսումների ժամանակ ասաց «Ելք» խմբակցության պատգամավոր Գեւորգ Գորգիսյանը:
Նա ասաց, որ «Հարկային օրենսգրքով» դրոշմապիտակներով դրոշմավորման ենթակա ապրանքների մասին դրույթը շատ խնդրահարույց է թռչնամիս ներմուծող եւ արտադրող, կաթնամթերքից պանիր արտադրող ընկերությունների համար. «Օրենսգիրքը ընդունելուց առաջ պետք է շահագրգիռ անձանց հետ խոսեիք, տեսնեիք, ինչ խնդիր կա, եթե այս դրույթը չփոխվի, մենք ունենալու ենք նաեւ թռչնամսի գնի աճ: Նախ, որակի անկում ենք ունենալու, որովհետեւ օրենքը պահանջում է, որ ներմուծեցիր թռչնամիս, պետք է ոչ թե ամեն մի արկղի, այլ ամեն մի հավի վրա դրոշմապիտակ խփես: Սառածի վրա չի կպնում, պետք է հավը հալեցնել, վրան կպցնել, նորից սառեցնել, ինչը բերելու է որակի անկման»:
ԱԺ տնտեսական հարցերի հանձնաժողովի նախագահ Խոսրով Հարությունյանը հակադարձեց, ասելով, որ նույնիսկ պատգամավորների խումբ են ուղարկել թռչնաբուծարան, որ խնդիրները հասկանան: Նա վստահեցրեց՝ «Թռչնամիսը դրոշմապիտակավորումից դուրս է հանված, ուղղակի, որ իմանաք: Տեղական արտադրության թռչնամիսը դրոշմապիտակավորման անհրաժեշտություն չունի»:
Իսկ ֆինանսների նախարար Վարդան Արամյանը արտահերթ ելույթում անդրադարձավ Նիկոլ Փաշինյանի ելույթին, որտեղ պատգամավորը մեջբերել էր նախարարի այն խոսքը, թե 2011-ին 7 տոկոս գնաճ է եղել, մա՞րդ է մեռել ու հեգնել:
Նախարարն ասաց, որ եթե առանձին միայն այդ հատվածն են վերցնում իր խոսքից, շատ գռեհիկ է. «Տպավորություն կարող է ստացվել, որ ֆինանսների նախարարը շատ գռեհիկ եւ մեծամտական մոտեցում ունի այն հարցի շուրջ, որը մեզ բոլորիս հետաքրքրում է: Եթե կլինի այդպիսի տպավորություն, որ մեր հայրենակիցներից ցանկացած անձ այդ արտահայտությունը կընկալի՝ որպես մեծամտական դրսեւորում, ես այս բարձր ամբիոնից խնդրում եմ ներողամիտ լինել: Իհարկե, այդպես չի եղել, մի ֆրագմենտ է եղել»:
Նախարարն ասաց, որ նշել է, որ նախորդ տարիներին ավելի բարձր գնաճ է եղել, բայց մեռնելու մասին խոսք չի եղել, ուստի եւս մեկ անգամ ազգաբնակչությունից ներողություն խնդրեց. «Ես ինձ համարում եմ ՀՀ քաղաքացի, մեծ պատասխանատվությամբ եմ պաշտոնավարում եւ կարծում եմ, մեր ջանքերը պետք է ուղղվեն մեր քաղաքացիների համար բարեկեցիկ ապագա ապահովելուն»:
Հռիփսիմե ՋԵԲԵՋՅԱՆ
