«Դուք շատ երկար ճանապարհ եք անցել՝ կառուցելով ամուր ժողովրդավարական երկիր արևելքի և արևմուտքի միջև»,- ՀՀ նախագահ Սերժ Սարգսյանի հետ աշխատանքային ճաշից հետո հայտարարեց Ֆրանսիայի Հանրապետության նախագահ Էմանուել Մակրոնը:
Ելիսեյան պալատում տեղի ունեցած մամուլի ասուլիսի ընթացքում Ֆրանսիայի նախագահը վստահեցրեց՝ «անկայուն տարածաշրջանում Ֆրանսիան միշտ ձեզ հետ կլինի»:
Էմանուել Մակրոնը հայտնեց, որ Շվեյցարիայում ՀՀ դեսպան Շարլ Ազնավուրն այսօր չի մասնակցում հանդիպմանը, քանի որ Մարսելում նրա համերգն է կայանում:
Ֆրանսիայի նախագահի հավաստմամբ՝ 2018-ը Հայաստանի համար կարևոր տարի է լինելու, քանի որ մայիսին ՀՀ-ն տոնելու է Առաջին Հանրապետության անկախության 100-ամյակը, այդ կապակցությամբ Ֆրանսիայի ԱԳ նախարարը կայցելի Հայաստան:
Էմանուել Մակրոնը տեղեկացրեց, որ Ֆրանկոֆոնիայի գագաթնաժողովի կապակցության ՀՀ-ի հրավերով այց կկատարի Հայաստան և առիթից օգտվելով՝ պետական այց կկատարի Հայաստան:
Էմանուել Մակրոնը հայտարարեց, որ աշխատանքային ճաշի ընթացքում քննարկվել է նաև տնտեսական հարաբերությունների, ներդրումների, տուրիզմի, էներգետիկայի ոլորտներին վերաբերող խնդիրներ:
Էմանուել Մակրոնն անդրադարձավ նաև ղարաբաղյան հակամարտության կարգավորմանը:
Նա հայտարարեց. «Նախագահ Սարգսյանի հետ հանդիպմանը հաստատեցի, որ մեզ համար կարևոր է հակամարտության կարգավորման հարցում լուծում գտնելը: Դա պետք է լինի երկու երկրների միջև համարձակ փոխզիջում»:
Ֆրանսիայի նախագահը հայտարարեց՝ այն բանակցությունները, որ սկսել են Ժնևում, մյուս բոլոր հանդիպումները՝ նախագահների և ԱԳ նախարարների մակարդակով, ունեն կարևոր դերակատարություն: Ֆրանսիայի նախագահը նաև կարևորեց Կրակովում ձեռք բերված պայմանավորվածությունները: Եզրափակելով խոսքը՝ Էմանուել Մակրոնը հայտարարեց. «Գիտեմ, որ խաղաղության քարոզումը շատ դժվար է, և ցանկանում եմ, որ հանդիպումները կոնկրետ արդյունքներ ունենան»:
Սերժ Սարգսյանը Ֆրանսիայի նախագահի հետ հանդիպումը տպավորիչ և անկեղծ համարեց: Իր ելույթում վստահեցրեց, որ կենսական հարցերում իրենց տեսակետները համընկնում են, իսկ մյուս հարցերում դրանք շատ մոտ են: Սերժ Սարգսյանը հայտարարեց, որ ԼՂ հակամարտությունը տարածաշրջանի ամենազգայուն հարցերից է և հավաստիացրեց.
«Խոսել ենք Լեռնային Ղարաբաղի հակամարտության մասին, որը, թերեւս, մեր տարածաշրջանի զգայուն թեմաներից է: Մենք բարձր գնահատեցինք Ֆրանսիայի որպես ԵԱՀԿ Մինսկի խմբի համանախագահ երկրի մոտեցումները, երկարամյա ջանքերը ուղղված հիմնախնդրի խաղաղ հանգուցալուծմանը եւ մեր տարածաշրջանում անվտանգության, կայունության եւ համագործակցության հաստատմանը: Հայաստանը հանձնառու է շարունակելու համանախագահների միջնորդությամբ բանակցությունները, հայտնի է, որ Լեռնային Ղարաբաղի ժողովուրդը պայքարում է ազատության համար, ինքնորոշման համար եւ այսպիսի պայքարը չի կարող բարեհաջող ավարտ չունենալ»:
Սերժ Սարգսյանը տեղեկացրեց, որ Ֆրանսիայի նախագահն իր հավանությունն է տվել Ֆրանկոֆոնիայի գագաթաժողովի շրջանակներում անցկացնել Ֆրանկոֆոն գործարարների համաժողով, որը նոր թափ կհաղորդի հայ-ֆրանսիական տնտեսական հարաբերություններին:
Անդրադառնալով ՀՀ-ԵՄ համաձայնագրի ստորագրմանը Սերժ Սարգսյանը վստահեցրեց՝ սա համաձայնագիր է, որը նոր հորիզոններ է բացում երկկողմ համագործակցության համար:
Տաթև ՀԱՐՈՒԹՅՈՒՆՅԱՆ
Փարիզ
