Լրահոս
Օրվա լրահոսը

Թեքեյան Կենտրոնում բացվել է բերձորցի երիտասարդ նկարչուհի Անահիտ Ըռքոյանի առաջին անհատական ցուցահանդեսը՝ նվիրված Արցախյան շարժման 30-ամյակին

Հունվար 24,2018 11:48

«Թեքեյան Կենտրոն» հիմնադրամի, Քաշաթաղի շրջվարչակազմի եւ «Հայրենասեր» հասարակական կազմակերպության աջակցությամբ հունվարի 22-ին Երեւանում՝ Թեքեյան Կենտրոնում, բացվեց բերձորցի երիտասարդ նկարչուհի, Երեւանի գեղարվեստի պետական ակադեմիայի գեղանկարչության ֆակուլտետի 3-րդ կուրսի ուսանողուհի Անահիտ Ըռքոյանի առաջին անհատական ցուցահանդեսը՝ նվիրված Արցախյան շարժման 30-ամյակին:

Ցուցահանդեսում ներկայացված է հեղինակի վերջին 5 տարիների ընթացքում՝ Երեւանի Փ. Թերլեմեզյանի անվան գեղարվեստի պետական քոլեջում եւ Հայաստանի գեղարվեստի պետական ակադեմիայում ուսանելու տարիներին ստեղծած ավելի քան 50 աշխատանք, այդ թվում՝ գունանկար, գրաֆիկա, մանրանկար:

Աշխատանքների վերաբերյալ իրենց տպավորությունները արտահայտեցին «Թեքեյան Կենտրոն» հիմնադրամի տնօրեն Ա. Ծուլիկյանը, Քաշաթաղի շրջվարչակազմի ղեկավարի տեղակալ Ա. Մխիթարյանը, «Հայրենասեր» ՀԿ համահիմնադիր Ս. Սարգսյանը, Գեղարվեստի պետական ակադեմիայի գունանկարչության եւ կոմպոզիցիայի դասախոս Ա. Հովհաննիսյանը, ՀՀ նկարիչների միության նախագահ Կ. Աղամյանը, Էջմիածին քաղաքի պատմության թանգարանի տնօրեն Ա. Թադեւոսյանը, քարանձավագետ Ս. Շահինյանը: Բարձր գնահատելով ներկայացված աշխատանքները, նրանք կարեւորեցին այն լույսն ու լավատեսությունը, կամքն ու աշխատասիրությունը, որ ճառագում են հեղինակի նկարներից:

Անահիտ Ըռքոյանի խոսքով, իր աշխատանքներում գլխավորը գույներն են, որոնք վկայում են արցախցի լինելու եւ կյանքի ու ապագայի հանդեպ դրական զգացումներ ունենալու մասին:

Ցուցահանդեսը Թեքեյան կենտրոնում կգործի մինչեւ հունվարի 31-ը /մուտքն ազատ է/, իսկ փետրվարին այն նախատեսվում է ներկայացնել Արցախում:

«Թեքեյան Կենտրոն» հիմնադրամ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հունվար 2018
Երկ Երե Չոր Հնգ Ուրբ Շաբ Կիր
« Դեկ   Փետ »
1234567
891011121314
15161718192021
22232425262728
293031