Արցախյան ազատամարտի մասնակիցներից շատերն այսօր՝ տարիների հեռվից, հումորով, համեստորեն, հաճախ նույնիսկ՝ ներքին ամոթխածությամբ են հիշում ու պատմում իրենց գլխին եկածները, իրենց կատարած սխրանքները, որոնց կարևորությունն ու կենսական նշանակությունը գուցե տարիներ անց պատմությունն այլ բարձունքներում կամփոփի ու կմատուցի սերունդներին: Իսկ այսօր, ողջ մնացած տղերքից շատերը, մոռանալով իրենց անձնական վաստակի մասին, առաջին իսկ հնարավորության դեպքում, ուզում են խոսել ընկերների հերոսություններից, բանակի կազմավորման հիմքում կանգնած՝ անմահացած ազատամարտիկների անհավանական գործողություններից:
Ինչպես արդեն տեղեկացրել էինք, «Մերոնք»-ն, այսուհետ, Հայաստանի ու Արցախի ողջ տարածքով մեկ, կփորձի ներկայացնել արցախյան ազատամարտի նվիրյալներին ու նրանց կատարած անգնահատելի գործերը: Բանակի տոնի նախօրեին, մենք եղանք Նոր Հաճնում: Տեղի Եռաբլուրում զրուցեցինք հրամանատար Բաբկեն Մարգարյանի հետ: Նոր Հաճնը, պատերազմի տարիներին, ուրույն ռազմաբազա է դարձել՝ կուտակելով թե՛ զենք-զինամթերք, թե՛ վառելիքի և այլ անհրաժեշտ մթերքների պաշար, և ամբողջի մեջ, հրամանատարի խոսքով, մեծ լումա են ունեցել տարածքի գրեթե բոլոր բնակիչները: Նոր Հաճնցիների ջոկատը, Սպարապետ Վազգեն Սարգսյանի հետ համաձայնեցնելով, կանգնած է եղել Բերդաձորի դժվարին պաշտպանության ակունքներում:
Մանրամասները՝ տեսանյութում:
Սուրեն ՍԱՐԳՍՅԱՆ
