Ֆրանսիայի նախագահ Էմանուել Մակրոնը երեքշաբթի երեկոյան Ֆրանսիայի հայկական կազմակերպությունների համակարգող խորհրդի հետ ամենամյա ճաշկերույթին խոստացել է օրացույցում ընդգրկել «Հայոց ցեղասպանություն հիշատակի օր», ինչպես որ խոստացել էր իր քարոզարշավի ընթացքում:
Ինչպես գրում է Le Figaro-ն, Ֆրանսիայի նախագահը, որը Երևան է ժամանելու հոկտեմբերին՝ Ֆրանկոֆոնիայի գագաթնաժողովի շրջանակում, հյուրընկալվել էր Անդրե Մանուկյանի մոտ, որը Փարիզի հյուրանոցներից մեկում հավաքել էր հայկական համայնքի մոտ 500 ներկայացուցիչների:
Ընթրիքին ներկա են եղել նաև Փարիզի քաղաքապետ Անն Իդալգոն, Իլ դը Ֆրանս երկրամասի ղեկավար Վալերի Պեկրեսը, հայկական ծագմամբ ֆրանսիացի պաշտոնյաներ՝ Պատրիկ Դևեջյանը և Լիոնի քաղաքապետ Ժորժ Քեփենեկյանը, Թուրքիայի խորհրդարանի ծագումով հայ պատգամավոր Կարո Փայլանը, ինչպես նաև հրեական համայնքի ներկայացուցիչներ:
«Արդարության և ճանաչման պայքարը մեր պայքարն է, մենք այն առաջնորդում ենք հիշողությամբ և հանրապետական օրացույցում Ցեղասպանության հիշատակման օր ավելացնելով», – ասել է Մակրոնը:
Պատրաստեց՝ Վիկտորյա ԱՆԴՐԵԱՍՅԱՆԸ
