«Երկիր Ծիրանի» կուսակցության առաջնորդ, նախկին պատգամավոր Զարուհի Փոստանջյանն այսօր Լոռիում շարունակեց իր իրազեկման ակցիան, որով քաղաքացիներին կոչ է անում համախմբվել եւ չհանդուրժել իշխանություններին: «Ցավով ենք ասում, որ Ալավերդիում էլ մարդ չի մնացել: Սա հատուկ մտածված ծրագիր է: Սերժ Սարգսյանի պաշտոնավարման տասը տարում հարյուր հազարավոր քաղաքացիներ լքել են երկիրը. եթե հանդուրժենք իշխանությանը, Հայաստանը կդատարկվի հայերից»,-շրջելով Ալավերդիի փողոցներով՝ հայտարարեց Զարուհի Փոստանջյանը:
Նա բնակիչներին հայտնեց, որ առաջիկա երկու ամսում՝ նույն օրը եւ նույն ժամին, քաղաքացիները պետք է դուրս գան փողոց եւ պահանջեն իշխանության հրաժարականը. «Մարտին եւ ապրիլին մենք կարող ենք տապալել իշխանությունը: Կամ կտապալենք, կամ կփթենք այս ճահճում»:
«Երկիր Ծիրանիի» անդամների կողքով ավտոմեքենայով երիտասարդ անցավ, որին մոտեցավ Զարուհի Փոստանջյանը եւ հարցրեց.
–Երիտասարդ, ի՞նչ եք ուզում, ինչո՞ւ եք խանգարում:
-Ոչ մի բան, չի կարելի՞ անցնել:
–Չէ, քանի՞ անգամ եք անցնում, արագ–արագ անցեք,մի խանգարեք մեզ:
-Մեր նախագահի հասցեին ստեղ բան չասեք,-նետեց տղամարդն ու հեռացավ:
Զարուհի Փոստանջյանը բղավեց. «Ձեր նախագահի հասցեին կասենք ինչ ուզում ենք, դե փախեք ստեղից»:
Ապա նա մոտեցավ ոստիկաններին՝ դժգոհելով, թե ինչու են նրանց ուղարկել իրենց հսկելու. «Գնացեք առաջին գիծ, ձեր տեղն այնտեղ է: Տաք հագնված 21 000 ոստիկան ունենք, իսկ մեր զինվորներին ծնողներն են հանդերձանք ուղարկում»:
Առեւտրի կետերից մեկում էլ մի կին-վաճառողի դուր չեկավ «Երկիր Ծիրանիի» անդամների իրազեկման ակցիան եւ նա կոչ արեց հեռանալ: «Ինձ բռնությա՞մբ եք սպառնում»,-բացականչեց Չարուհի Փոստանջյանը: Ապա կինը կուսակցության անդամներից Մարինա Խաչատրյանին ասաց,-«քայլող շա՞ռ ես, գնա ստեղից»,-ու ոստիկանին խնդրեց հեռացնել «Երկիր Ծիրանիի» կանանց:
Ապա «Երկիր Ծիրանիի» անդամներին մոտեցավ նույն երիտասարդը: Զարուհի Փոստանջյանը հայտարարեց, որ նա ՀՀԿ-ական է եւ հիմա էլ իր ընկերների հետ է եկել «հաշիվ պահանջելու»: Կանայք եւ երիտասարդը փոխադարձ վիրավորանքներ ասացին իրար հասցեին: Փոստանջյանը նրանց «ոհմակի ներկայացուցիչներ» անվանեց:
Լուիզա ՍՈՒՔԻԱՍՅԱՆ
