Փետրվարի 12-ից Շիրակի պետական համալսարանի Պատմության եւ փիլիսոփայության ամբիոնի վարիչ Հովհաննես Խորիկյանը հացադուլ է սկսել: Aravot.am-ի հետ զրույցում նա հայտնեց. «Անցյալ տարվա սեպտեմբերին մենք բաց նամակ ուղղեցինք ՀՀ նախագահին եւ վարչապետին, որ ամիսներ շարունակ ռեկտոր Մինասյանը շարունակում է իր ինքնագործունեությունը, բացարձակ հաշվի չի նստում ոչ մի ընթացակարգի, կարգի եւ կանոնադրության հետ, անում է՝ ինչ ուզում է, ինքը օրենքներից վեր է կանգնած: Փաստորեն այս համալսարանը իր համար դարձրել է պետություն պետության մեջ, ինքն էլ իրեն արքա է պատկերացնում:
Անցյալ երկուշաբթի օրը փետրվարի հինգին պետք է քննարկվեր դեկանի հավակնորդի թեկնածությունը: Ըստ համալսարանի կանոնադրության, դեկանի, ամբիոնի վարիչների ընտրությունը պետք է կատարի ֆակուլտետի խորհուրդը: Ես եւ Համբարյան Գագիկը ցույց տվեցինք, որ այստեղ պետք է կատարվի, մինչդեռ Սահակ Մինասյանը հակառակ կանոնադրության, որը համարում է թղթի կտոր, դեկանների եւ ամբիոնի վարիչների ընտրությունը տեղափոխել է այսօր՝ գիտական խորհուրդ:
Ցույց են տալիս դեկանների ու ամբիոն վարիչների կանոնակարգ, որտեղ նշված է, որ գիտական խորհուրդը պետք է իրականացնի ընտրությունը, բայց մեր հիմնական փաստաթուղթը կանոնադրությունն է, ոնց որ մեր երկրի Սահմանադրությունը: Սա բացահայտ կոռուպցիա եւ հովանավորչություն է իր կողմից»:
Հովհաննես Խորիկյանը նաեւ հայտնեց, որ իր պահանջները ներկայացրել է ԿԳ նախարարին, որպեսզի նա կասեցնի այսօրվա գիտական խորհրդում կայանալիք ընտրությունները:
Գոհար ՀԱԿՈԲՅԱՆ
