Այսօր` փետրվարի 16-ին, Արցախի Գերագույն խորհրդի առաջին նախագահ, Արցախյան շարժման առաջամարտիկ Արթուր Մկրտչյանը կդառնար 59 տարեկան: 32 տարեկանում, ընտրվելով Գերագույն խորհրդի նախագահ, նա դարձավ նորանկախ Արցախի առաջին առաջնորդը:
Ամեն տարի այս օրը Ստեփանակերտի հուշահամալիր` նրա շիրիմին են այցելում Արցախի քաղաքական գործիչները, նրա կուսակցական ընկերները, հարազատները ծաղիկներ խոնարհելու և հարգանքի տուրք մատուցելու:
Արցախի խորհրդարանի փոխնախագահ Վահրամ Բալայանը Aravot.am-ի հետ զրույցում նշում է, որ Արցախյան շարժումը ծնեց իր լիդերներին և նրանցից մեկն Արթուր Մկրտչյանն է. «Բարեբախտաբար ես նրան լավ էի ճանաչում, երկուսս էլ պատմաբաններ ենք և շփումներ ունեինք դեռ ուսանողական տարիներից: Իսկապես ազնվագույն անձնավորություն էր, առաջնորդ էր, որ ապրում էր ժողովրդի հոգսերով և ցավերով: Ապրում հասարակ կենցաղվարությամբ` լինելով ժողովրդի հետ համաքայլ: Հիշում եմ, նույնիսկ երկրի ղեկավարին վայել հագուստ չուներ, և երբ հորդորում էինք համապատասխան հագուստ կրել, միշտ դեմ էր լինում: Նրան պետք է երախտապարտ լինել, որ իր սերնդակիցների հետ միասին կարողացավ ժողովրդի ուժերն կենտրոնացնել և հեքիաթային հաջողություն գրանցել»:
Դավիթ ԱԲԱՂՅԱՆ
իսկ ով սպանեց այդ մարդուն