«Հանուն Հայաստան պետության» ճակատի անդամ, ԱԺ նախկին փոխնախագահ Կարապետ Ռուբինյանն այսօր ճակատի անդամների մասնակցությամբ կազմակերպած քննարկմանն անդրադարձավ Արցախյան շարժման 30-ամյակին՝ այն որակելով որպես պատմության փայլուն էջ: Կարապետ Ռուբինյանը ճակատի անունից հայտարարություն արեց, որում ասվում է. «Արցախյան շարժման շնորհիվ ազատագրվեց Արցախն ու հիմնվեց Հայաստանի անկախ պետությունը: Իրար հաջորդող ընտրությունները կեղծող իշխանությունների շնորհիվ այսօր խամրել է բարեկեցիկ հայրենիք ունենալու հույսը, ինչի հետեւանքով հազարավոր քաղաքացիներ լքում են երկիրը: Հայաստանը կանգնած է անկախ պետականության կորստի շեմին»:
Կարապետ Ռուբինյանի խոսքով՝ ներկայիս իշխողները դարձել են մեր պետականության ոչնչացմանը ձգտող ուժերի աջակիցը. «Թշնամու տարածքային նկրտումների դեմն առնելու միակ ճանապարհը կրկին միասնական ազգ-պետություն դառնալն է եւ այս ապօրինի ռեժիմից ազատվելը: Այս գործում ծավալուն ներդրում պետք է ունենան Արցախյան շարժման պայքարի ոգին պահպանած մարդիկ եւ անկախ ՀՀ-ում ծնված երիտասարդությունը»:
Լուիզա ՍՈՒՔԻԱՍՅԱՆ
