Ռուսաստանի ԱԳՆ մամուլի և տեղեկատվության բաժինը պարզաբանում է հրապարակել կապված վերջին շրջանում մամուլում տեղ գտած այն տեղեկությունների հետ, որ Սիրիայում ռազմական բախման հետևանքով կան տասնյակ (որոշ տեղեկություններով՝ մինչև 200) զոհեր, որոնք ունեն Ռուսաստանի քաղաքացիություն:
Հաղորդագրության մեջ նշվում է, որ Սիրիայում գտնվում են Ռուսաստանի քաղաքացիներ, «որոնք այնտեղ են մեկնել իրենց կամքով և տարբեր նպատակներով», հետևաբար ԱԳՆ իրավասության շրջանակում չէ «գնահատել նրանց այդ որոշումների իրավազորությունը և օրինականությունը»:
«Այդուհանդերձ, հաշվի առնելով, որ խոսքը արտասահմանում գտնվող Ռուսաստանի քաղաքացիների մասին է, կցանկանայինք նշել հետևյալը. վերջերս տեղի ունեցած ռազմական բախման ընթացքում, որին որևէ կերպ չեն մասնակցել Ռուսաստանի Դաշնության զինծառայողներ, և չեն կիրառվել հաստիքային տեխնիկական միջոցներ, կան Ռուսաստանի և ԱՊՀ երկրների զոհված քաղաքացիներ, այդ մասին արդեն խոսվել է, կան նաև վիրավորներ, դրանց թիվը մի քանի տասնյակ է: Նրանց աջակցություն է ցուցաբերվել Ռուսաստան վերադառնալու հարցում, որտեղ, որքան մեզ հայտնի է, նրանք բուժման կուրս են անցնում տարբեր բժշկական հաստատություններում»,- ասվում է հաղորդագրության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
