Այսօր Երեւան քաղաքի ընդհանուր իրավասության դատարանի Շենգավիթ վարչական շրջանի նստավայրում կաշառք պահանջելու եւ ստանալու մեջ մեղադրվող նախկին դատավոր Իշխան Բարսեղյանի գործով նիստը կրկին չկայացավ:
Այս անգամ էլ էր Բարսեղյանը «Դատապարտյալների հիվանդանոց» ՔԿՀ-ից գրություն ուղարկել դատարան՝ տեղեկացնելով, որ վատառողջ է եւ չի կարող ներկայանալ դատարան: Նա կրկին խնդրել էր հետաձգել նիստը:
Հիշեցնենք, որ նախորդ դատական նիստին էլ էր Բարսեղյանը նման գրություն ուղարկել՝ խնդրելով հետաձգել, մինչեւ իր բուժման կուրսի ավարտը: Բայց դատարանը բավարարելով մեղադրող դատախազ Կարեն Բիշարյանի միջնորդությունը՝ մեկ շաբաթով էր հետաձգել:
Դատարանը նիստը հետաձգեց մինչեւ մարտի 15-ը:
Հիշեցնենք, որ Իշխան Արամայիսի Բարսեղյանին մեղադրանք է առաջադրվել այն բանի համար, որ նա 1999 թվականից զբաղեցնելով Երևան քաղաքի Շենգավիթ վարչական շրջանի ընդհանուր իրավասության դատարանի դատավորի պաշտոնը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ, Նորիկ Հակոբյանի օգտին իր լիազորությունների շրջանակում գործողություններ կատարելու համար նրանից միջնորդի միջոցով պահանջել և անձամբ ստացել է խոշոր չափերով կաշառք:
Արփինե ՍԻՄՈՆՅԱՆ
