Սույն թվականի փետրվարի 17-ին «Հասարակական ձայն» (Civil Voice) հասարակական կազմակերպության փորձագետները ՀՀ Լոռու մարզում հերթական ուսումնասիրությունները կատարելիս ականատես են եղել Ախթալայի ԼՀԿ-ից պոչանքների Ախթալա գետը թափվելու իրողությանը:
Նշված փաստը նկարահանվել, ինչպես նաև հանրության լայն շրջանակներին տեղեկացնելու նպատակով օնլայն ռեժիմով հեռարձակվել է համացանցում: Միաժամանակ, հեռախոսակապի միջոցով, անմիջապես տեղյակ է պահվել ՀՀ ԲՆ բնապահպանության և ընդերքի տեսչական մարմնի ղեկավարությանը:
Տեղեկացնում ենք նաև, որ Ախթալա և Դեբեդ գետերի էկոհամակարգերի վրա Ախթալայի ԼՀԿ-ից պոչանքների, անօրինական արտանետման ազդեցության չափը գնահատելու նպատակով Ախթալա և Դեբեդ գետերի ջրերից ու հատակային նստվածքներից վերցվել են փորձանմուշներ: Պոչանքների բաղադրության նույնականացման նպատակով նմուշներ են վերցվել նաև Ախթալա գետը լցվող պոչանքներից:
Նմուշների անալիզների արդյունքները կհրապարակվեն պատրաստ լինելուն պես:
Ստորև ներկայացնում ենք նկարներ և տեսանյութեր, որոնցում երևում է, թե ինչպես են պոչանքները պոչամբար ուղղորդվելու փոխարեն, առանց մաքրման, ուղղակի լցվում Ախթալա գետը: Պոչանքների անօրինական ներհոսքը գետ երևում էր նաև Ախթալայի վանքի տարածքից:
Ախթալայի ձորը:
Ախթալայի կոմբինատի պոչանքների՝ Ախթալա գետ ներհոսքի տեսարանը:
Ախթալա գետը կոմբինատի պոչանքների ներհոսքի գոտում: Նկարում պարզ երևում են պոչերի նստվածքներն ու փրփրաջուրը:
Ախթալա գետը կոմբինատի պոչանքների ներհոսքի գոտուց ներքև: Նկարում պարզ երևում է, որ գետի հունով հոսում է պոչանքներով աղտոտված ջուր:
Ախթալա գետի գետաբերանի հատվածը: Նկարում երևում է, որ պոչանքներով աղտոտված ջուրը ներհոսում է Դեբեդ գետ:
Դեբեդ գետը Ախթալա գետի միախառնումից ներքև: Նկարում երևում է Դեբեդի և Ախթալայի ջրահոսքերի գույների տարբերությունը: Դեբեդի ձախ ափի երկայնքով հստակ երևում է Ախթալայից ներհոսող պղտոր կեղտաջուրը, իսկ ամբողջ ափը ծածկված է պոչանքներով: Ակնհայտ է Դեբեդ գետի աղտոտումը:
Սպսում ենք պատկան մարմինների արձագանքին:
Ընթերցողներին առաջարկում ենք նաև ուսումնասիրել ՀՀ Բնապահպանության նախարարության Շրջակա միջավայրի մոնիթորինգի և տեղեկատվության կենտրոնի պաշտոնական տեղեկանքները: Օրինակ, 2017 թվականի 4-րդ եռամսյակի ՀՀ Շրջակա միջավայրի մոնիթորինգի արդյունքների մասին տեղեկանքում բերված տվյալները, տես հավելված 1 և քարտեզ, ցույց են տալիս, որ Ախթալա գետի գետաբերանի ջրերը աղտոտված են ցինկ, կադմիում, մանգան, կոբալտ տարրերով, սուլֆատ իոններով, կախված նյութերով, առանձին դեպքերում պղինձով: Միևնույն պատկերն է նաև նախորդ ժամանակահատվածներում:
Աղտոտիչների համախումբը ցույց է տալիս, որ Ախթալա գետի ջրերը մշտապես աղտոտված են ԼՀԿ-ի արտադրական կեղտաջրերի, պոչանքների, գործող և լքված բովանցքներից դուրս եկող հանքաջրերի, Ախթալա-2 (Նազիկ) պոչամբարից ինֆիլտրացվող թթվային դրենաժի ջրերի ներհոսքով:
Միայն այս տեղեկանքում բերված պաշտոնական տվյալները բավարար են, որ ՀՀ ԲՆ համապատասխան պատասխանատուները և ՀՀ ԲՆ բնապահպանության և ընդերքի տեսչական մարմինը արտակարգ վերահսկողական ռեժիմ սահմանեն Ախթալա գետի շարունակական աղտոտումը դադարեցնելու համար: Սպասենք:
Civil Voice ՀԿ
Տեղեկատվության և հասարակայնության հետ կապերի բաժին
