«Ժիրայր Սեֆիլյանին ձերբակալեցին, երբ ընտանիքներով Ռալֆ Յիրիկյանի հետ նստած էին ռեստորանում». Արմեն Լուսինյան

Շուշիի գումարտակի ազատամարտիկ Արմեն Լուսինյանի կարծիքով՝ խոսել Ժիրայր Սեֆիլյանի գործի մասին, հնարավոր չէ չանդրադառնալ ՀՀ ներկայիս քաղաքական իրավիճակին:

«Հայելի» ակումբում լրագրողների հետ հանդիպմանը պարոն Լուսինյանն ասաց. «Բոլորս էլ գիտենք, որ մեր երկրում ոչ ոք չի կարող բացառել՝ այսօր կամ վաղը պատերազմ կարող է սկսվել: Սպառնալիքը բավական լուրջ է: Բայց ինչո՞ւ Հայաստան պետությունը՝ Արցախն էլ հետը, այդ պատերազմին չի պատրաստվում: Այս հարցի պատասխանն ի վերջո պիտի ստանա՞նք, թե՞ ոչ: Պետության՝ պատերազմին պատրաստվելը նշանակում է բանակը կարգի բերել, փորձել երկրում կոռուպցիայի դեմ պայքարել, քաղաքական դաշտն ավելի առողջացնել, հասարակությանը մոբիլիզացնել»:

Լինելով Ժիրայր Սեֆիլյանի մարտական ընկերը՝ պարոն Լուսինյանը հավաստիացրեց՝ նա երկար տարիներ հասկանում էր այս վտանգը:

Հիշեցնելով, թե ինչ նախաձեռնություններով է Ժիրայր Սեֆիլյանը հանդես եկել, նա ներկայացրեց Սեֆիլյանի և Ռալֆ Յիրիկյանի հետ առնչվող մի դրվագ. «2006-ին Ժիրայրը հանդես եկավ հայ կամավորականների համախմբում կոչվող նախաձեռնությամբ: Իր մարտական ընկերներին հավաքեց:

Նպատակն Արցախի պաշտպանությունն էր՝ նկատի ունենալով ազատագրված տարածքները: Առաջին հավաք-ժողովից անմիջապես երկու օր հետո Ժիրայրին ձերբակալեցին: 2006-ին Բեյրութից իր պատանեկության, երիտասարդության շրջանի ընկեր Ռալֆ Յիրիկյանի հետ ռեստորանում գտնվելով՝ նրանց շուրջկալ արեցին ու ձերբակալեցին: Ոչ մի հիմք չկար: Ձերբակալեցին, հետո փորձեցին գործը կարել: Մեղադրանք առաջադրվեց սահմանադրական կարգի բռնի տապալման կոչեր ձևակերպմամբ, բայց դատավարության ժամանակ չկարողացան ապացուցել»:

Տաթև ՀԱՐՈՒԹՅՈՒՆՅԱՆ