#ԵՊՀՌեստարտ նախաձեռնության առաջին բաց դասախոսությունը տեղի ունեցավ Չարենցի այգում։ Թեման՝ Կրթական համակարգի խնդիրներն էր ԵՊՀ-ի օրինակով և միջազգային փորձը:
Բանախոս Վահրամ Սողոմոնյանը ներկայացրեց կրթության բացերը, մեր սպասելիքները պետությունից և պետության քայլերը՝ դրանց առիթով։
Նախ և առաջ կարևորվեց կրթության որակը ու քննադատական միտքը, որը ինչպես նշեց քաղաքական «Դիսկուրս» (diskurs.am) հանդեսի խմբագրակազմի անդամը՝ չի խրախուսվում մեծամասնության կողմից։ Հաջորդը ակադեմիական ազատությունն էր․ «Մենք գործ ունենք հասարակական պրոցեսների հետ, չենք կարող միայն զբաղվել ծրագրավորմամբ։ Այդ առումով ակադեմիական ազատություն չունենալը խոչընդոտում է գիտության զարգացմանը և միջազգայնացմանը։ Այժմ միջազգայնացումը գլխավոր խնդիր է բուհերի համար։ Եթե դու չես կարողանում ուսանողներին ուղարկել այլ բուհ՝ ուրիշ փորձառություն ստանալու, դու չես կարող նորմալ կրթություն ապահովել»։
Ինչ վերաբերվում է կրթության բովանդակությանը՝ Վահրամ Սողոմոնյանը բերեց տնտեսագիտության օրինակը․ «Այդ առարկան դասավանդվում է տասնամյակներ շարունակ, բայց նույն մեթոդով։ Շատ ուսանողներ ասում են, որ դասավանդված տնտեսագիտության ու ներկայիս շուկայի միջև կապը չեն տեսնում»։
Ինչ վերաբերվում է կրթության զարգացման միտումներին, Հայաստանի պայմաններում դրանք երկուսն են՝ սոցիալական արդարության վրա հիմնված մոտեցումը, որ բոլորը ստանան նույն կրթությունը, և էլիտարացման մոտեցումը։
Իսկ իրավիճակը փոխելու վերաբերյալ բանախոսը հետևյալ առաջարկությունը արեց․ «Ըստ էության շատ կարևոր է, որ գաղափարական խմբեր ձևավորվեն հենց բուհերի ներսում։ Ամբողջ աշխարհում առաջնակարգ բուհերում ճաշարաններում սեղաններին թռուցիկներ են դրված։ Մարդիկ մտածում են հարցերի շուրջ և դրա հետ կապված կոչեր անում, կամ կարծիքը տարածելու ձևեր գտնում։ Առաջին հերթին այլընտրանքային հարթակներ պիտի ստեղծվեն»։
Նա հորդորեց ներկաներին քննադատաբար վերաբերվել ամեն ինչին և հարցադրումներ անել, որովհետև այժմ քաղաքացիական հասարակությունը ևս ճգնաժամի մեջ է։
Կարինե ԿԻՐԱԿՈՍՅԱՆ
