«Օրինաց Երկիր» կուսակցության հերթական համագումարում այսօր ելույթ ունեցավ կուսակցության անդամ, նախկին պատգամավոր Հեղինե Բիշարյանը՝ մատնանշելով, որ ՕԵԿ-ը մշտապես հավատարիմ է եղել իր առաքելությանը: Մեկնաբանելով այն փաստը, որ 2017թ. ԱԺ ընտրությունների արդյունքում ՕԵԿ-ը չանցավ խորհրդարան, նա նշեց. «Մեր ցանկությունն էր՝ Հայաստանը տանել վերածննդի ճանապարհով: Բայց հայտնի է, որ մեզանում ընտրությունները չեն որոշվում գաղափարով ու որակով, այլ փողի ու վարչական լծակներով: Դրա համար այսօր ունենք այն, ինչ ունենք»:
Բիշարյանը փաստեց, որ ՕԵԿ-ը 260 օրենքի հեղինակ է եւ հպարտանում է իր կատարած աշխատանքով, ապա ԱԺ ընտրությունների վարկանիշային համակարգը խայտառակություն որակեց: Հեղինե Բիշարյանը խոսեց ՀՀ սոցիալ-տնտեսական վիճակի մասին. «Շատ մարդիկ մտածում են, թե միայն եկեղեցին է սրբավայր, բայց մեր պապերի գերեզմաններն էլ են սրբավար, որոնք չենք ուզում թողնել ու լքել երկիրը: Ցավ եմ ապրում, երբ հարազատներս ու ընկերներս հեռանում են երկրից: Դա ողբերգություն է»:
Հետո Հեղինե Բիշարյանը մի դեպք պատմեց. «Վերջերս մեր ընկերներից մեկին սրտի ծանր վիրահատության համար 4 միլիոն 800 000 դրամ էր պետք: Հիվանդանոցում մինչեւ չեն վճարել՝ վիրահատությունը չեն արել: Որտեղի՞ց շարքային քաղաքացուն նման գումար: Մի գիշերում կարելի՞ է այդքան գումար հավաքել»:
Լուիզա ՍՈՒՔԻԱՍՅԱՆ
