Երեկ Ազգային վիճակագրական ծառայությունը հրապարակեց 2017 թվականի տնտեսական աճի ցուցանիշները, համաձայն որի, նախորդ տարի մեր երկրի ՀՆԱ-ն կազմել է 7.5 տոկոս: Ըստ նույն աղբյուրի, տնտեսական աճը բարելավվել է մասնավորապես` արդյունաբերության, առեւտրի եւ ծառայությունների, շինարարության եւ էներգետիկ ոլորտների հաշվին:
Արձագանքելով տնտեսական 7.5 տոկոս աճի վերաբերյալ հրապարակումներին, Կարեն Ճշմարիտյանը, որը երկար տարիներ նախորդ կառավարություններում զբաղեցրել է առեւտրի եւ տնտեսական զարգացման, արդյունաբերության եւ առեւտրի նախարարների պաշտոնները, ֆեյսբուք սոցիալական ցանցում վարչապետ Կարեն Կարապետյանի կառավարությանը խորհուրդներ է տվել` ինչ անել, որպեսզի 7.5 % տնտեսական աճը պահպանվի: Նախկին նախարարի դիտարկմամբ, առաջին` պետք է ապահովել ՓՄՁ զարգացում` առանց շեմն իջեցնելու, ներդրումային միջավայրը բարելավել` չհարկելով դիվիդենտները, բանակցել եւ հասնել նրան, որպեսզի ԵԱՏՄ-ում արտոնությունները պահպանվեն:
Կարեն Ճշմարիտյանի կարծիքով պետք է նաեւ վերանայել եկամտահարկի, հողի հարկի, շահութահարկի եւ գույքահարկի դրույքաչափերը:
Նախկին նախարարը ապա` հռետորական հարց է ուղղում` սլաքն ուղղելով նաեւ միջազգային կառույցների կողմը «IMF, WB, EBRD, ADA, եւ այլն, բա ու՞ր մնացին նրանց կանխատեսումները»:
Կարեն Ճշմարիտյանն այդ աճը չնկատող քաղաքացիներին էլ ձեռքի հետ խորհուրդ է տալիս 2-3 տարի սպասել, քանի որ նվազագույնն այդքան է պետք, որպեսզի այդ աճը պահպանվելու դեպքում մարդիկ իրենց կաշվի վրա զգան:
Լուսինե ԲՈՒԴԱՂՅԱՆ
