Կառավարության մարտի 15-ի նիստի օրակարգում է ներառված ՀՀ դատախազներին գործուղումների ժամանակ բնակելի տարածք վարձակալելու համար վճարման կարգն ու չափը սահմանելու մասին որոշման նախագիծը:
Կառավարություն ներկայացրած այս նախագծում բնակելի տարածքի վարձակալման համար նախատեսված գումարն անհավանական թիվ է:
Օրինակ՝ նախագծում գրված է՝ «Սահմանվում են ՀՀ դատախազներին մշտական բնակության վայրից դուրս գործուղելիս բնակելի տարածությամբ ապահովելու անհնարինության դեպքում դրամական փոխհատուցում տալու կարգն ու չափը:
Անհրաժեշտության դեպքում, պայմանավորված դատախազին իր բնակության վայրից 30 կմ եւ ավելի հեռավորությամբ վայրում «Դատախազության մասին» Հայաստանի Հանրապետության օրենքով սահմանված կարգով նշանակելիս կամ գործուղելիս բնակելի տարածությամբ ապահովելու անհնարինությամբ, նրան օրական վճարվում է դրամական փոխհատուցում բնակելի տարածության վարձակալության դիմաց՝ փաստացի վճարված գումարի չափով, բայց ոչ ավելի, քան`
Նախագծով առաջարկվող կարգավորումը գործում է նաեւ ՀՀ քննչական կոմիտեի ծառայողների համար:
Դժվար թե Երեւանում կամ Երեւանից դուրս 1500, 500 կամ 800 դրամով բնակելի տարածք հնարավոր լինի գտնել: Արդյոք կա՞ վրիպակ ներկայացված թվերում, եւ դրանց ճշգրտության վերաբերյալ Aravot.am-ը փորձեց պարզաբանում ստանալ գլխավոր դատախազությունից: Մեր հարցին ի պատասխան դատախազությունից վստահեցրին՝ վրիպակ չկա: Մենք նաեւ խնդրել էինք պարզաբանել, թե ինչո՞վ է պայմանավորված այս անիրատեսական ցածր գները, սակայն դատախազությունից հաստատեցին այն, ինչ արդեն գրված է նախագծում, խոսքը բնակելի տարածքի օրական վարձի մասին է:
Եթե այդ 1500, 500 կամ 800 դրամ սահմանված գումարը ասենք 1 քառակուսի մետրին է վերաբերում, ապա պետք է որ նախագծում այդ մասին նշված լիներ, կամ գոնե դատախազության մամուլի ծառայությունը, որը համապատասխան բաժնի հետ պատասխանը համաձայնեցրել էր, նշեին, որ խոսքը 1 քմ-ի մասին է:
Եթե գլխավոր դատախազությունն այսքան էժան վարձով բնակարանների կամ հյուրատների տեղը գիտի, լավ կլիներ կիսվեր «գաղտնիքով». Ներգնա զբոսաշրջությունը կխթանվեր:
Ի դեպ, նախագծում նաեւ նշված է, որ դրա կապակցությամբ ՀՀ 2018 թվականի պետական բյուջեում նախատեսվում է ծախսերի ավելացում 16 միլիոն 425 հազար դրամի չափով:
Նելլի ԲԱԲԱՅԱՆ
