«Պոլիմետալ Արմենիա» ՍՊԸ-ն նախատեսում է 2018-2021 թթ. իրականացնել երկրաբանահետախուզական աշխատանքներ Լոռու մարզի Ալավերդի եւ Շնող, Տավուշի մարզի Կողբ եւ Նոյեմբերյան համայնքների վարչական սահմաններում գտնվող տարածքներում: Նախատեսվող գործունեության նպատակը տարածաշրջանի հանքահումքային ներուժի եւ տարածաշրջանում լեռնահանքային ոլորտի զարգացման հեռանկարների վերհանումն է:
«Շրջակա միջավայրի վրա ազդեցության գնահատման եւ փորձաքննության մասին» ՀՀ օրենքով սահմանված կարգով նախնական փորձաքննության գործընթացի շրջանակներում հայտարարվել է 2018 թ. մարտի 20-ին Նոյեմբերյան քաղաքի մշակույթի կենտրոնի շենքում «Պոլիմետալ Արմենիա» ՍՊԸ կողմից նախատեսվող գործունեության վերաբերյալ հանրային քննարկում անցկացնելու մասին: Հանրային քննարկումը համատեղ իրականացնելու էին «Պոլիմետալ Արմենիան» եւ նախատեսվող գործունեության իրականացման տարածքների համայնքների ղեկավարները:
Համացանցում գործում է «Դեմ ենք Նոյեմբերյան համայնքում ընդերքօգտագործման նպատակով բոլոր տեսակի հետազոտություններին» նախաձեռնությունը, որը Նոյեմբերյանի տարածքում ընդերքօգտագործման նպատակով հետազոտությունները կանխելու խնդրանքով դիմել է Սերժ Սարգսյանին, Տավուշի մարզպետ Հովիկ Աբովյանին, Նոյեմբերյան համայնքի ղեկավար Կարեն Աբազյանին:
Խնդրագրում ասվում է. «Մենք` նոյեմբերյանցիներս, դեմ ենք հանքարդյունաբերությանը մեր համայնքի տարածքում, քանի որ համայնքի ապագան տեսնում ենք էկոտուրիզմի զարգացման մեջ, իսկ հանքարդյունաբերությունն ու էկոտուրիզմը համատեղելի ուղղություններ չեն»: Այդ նախաձեռնությանը միանալու համար համացանցի change.org էջում մարտի 12-ից ստորագրահավաք է ընթանում:
Խոշորացված Նոյեմբերյան համայնքի ղեկավար Կարեն Աբազյանն իր անձնական կարծիքը հայտնելով՝ մեզ ասաց, որ Նոյեմբերյանի սարերն ու անտառներն իրենց համար շատ թանկ են, Նոյեմբերյանում առավել զարգացած է գյուղատնտեսությունը, նպատակ կա տարածքում զբոսաշրջությունը զարգացնելու, դա իր նախընտրական ծրագրի մեջ նշված է: Նա ասաց, որ ինքը որպես համայնքի ղեկավար ցանկացած հարցով ժողովրդի կողքին է:
Կ. Աբազյանը հայտնեց, որ «Պոլիմետալ Արմենիան» երկրաբանահետախուզական աշխատանքներ է նախատեսում 180 քառակուսի կիլոմետր տարածքում, որից 43 քառակուսի կիլոմետրը Նոյեմբերյան համայնքի, 26 քառակուսի կիլոմետրը Կողբ համայնքի տարածքն է, մնացածը`մեծ մասը, Ալավերդի եւ Շնող համայնքների տարածքն է:
Այսօր`մարտի 15-ին hetq.am կայքը հրապարակել է. «Պոլիմետալ Արմենիա» սահմանափակ պատասխանատվությամբ ընկերությունը տեղեկացնում է, որ «առաջնահերթ կարևորելով իր գործունեության դրական հանրային ընկալումը»՝ դադարեցնում է Լոռու մարզի Ալավերդի եւ Շնող, Տավուշի մարզի Նոյեմբերյան և Կողբ համայնքների վարչական տարածքներում երկրաբանահետախուզական աշխատանքների ծրագրի՝ շրջակա միջավայրի վրա ազդեցության փորձաքննության իրականացման և այդ գործընթացի շրջանակներում հանրային քննարկման կազմակերպման ուղղությամբ աշխատանքները:
Ընկերությունը տեղեկացնում է, որ որոշմանը նախորդել է Տավուշի մարզի Նոյեմբերյան համայնքի ղեկավարի, ավագանու անդամների և քաղաքացիական հասարակության ներկայացուցիչների հետ ընկերության ներկայացուցիչների հանդիպումը, որի շրջանակներում համայնքի ներկայացուցիչների հնչեցրած դիրքորոշումներն ուղղված են եղել Նոյեմբերյանի տարածքում երկրաբանահետախուզական աշխատանքների կատարումը բացառելուն»:
Ոսկան ՍԱՐԳՍՅԱՆ
