«Այդ պայմանավորվածությունն ադրբեջանական կողմից կհանդիպի խոչընդոտների: Դրա իրականացումը թերեւս կձգձգվի: Ապրիլին «Իլհամ Ալիեւի ընտրություններին» հաջորդող մեկ-երկու ամսում դժվար թե այդ հարցում շարժ տեղի ունենա»,- «Առավոտ»-ի հետ զրույցում անդրադառնալով այն փաստին, որ դեռեւս հունվարին կրակովյան բանակցությունների ժամանակ կողմերը ձեռք էին բերել Արցախյան հակամարտության շփման գծում ԵԱՀԿ դիտորդների թիվը 6-7-ով ավելացնելու պայմանավորվածություն, ասաց Արցախի նախկին արտգործնախարար, ՀՀ արտակարգ եւ լիազոր դեսպան Արման Մելիքյանը:
Նրա խոսքով՝ ամեն դեպքում դիտորդների թվի հնարավոր ավելացումը հարցի լուծում չի ենթադրելու. «Լավագույն դեպքում այն կնպաստի «ստատուս քվո»-ի ամրագրմանը եւ երկարաձգմանը: Մինչդեռ Ադրբեջանը մտադրվելու է հնարավորինս արագ փորձել սկսել «տարածքները հետ բերել» իր հսկողության տակ: Իսկ մեզ համար նման օրակարգը լուրջ՝ դրական տեղաշարժեր չի պարունակում»: Արման Մելիքյանի համոզմամբ՝ հակամարտության լուծման համար այլ ուղիներ կան՝ առավել կարեւոր, քան, օրինակ, դիտորդների թվի ավելացումն է: «Ցավոք, Հայաստանի իշխանություններն այս հարցում ցանկություն չունեն վերանայելու իրենց մոտեցումները»,- ասում է նա:
ԼՈՒԻԶԱ ՍՈՒՔԻԱՍՅԱՆ
«Առավոտ»
16.03.2018
