«Ժիրայր Սեֆիլյանի եւ մյուսների գործով» դատական նիստում այսօր պաշտպանական ճառով հանդես եկավ նաեւ ամբաստանյալներից Գալուստ Գրիգորյանը: «Զենքի կամ քաղաքականության, առավել եւս՝ հեղափոխության հետ ընդհանրապես կապ չեմ ունեցել: Դա արդեն ապացուցում է, որ ես չէի կարող կապ ունենալ «հանցավոր խմբի» հետ: Ուղղակի ծանոթ էի իրենց, այո, զենքն իմ ձեռքով անցել է, միայն դա եմ ընդունում: Բայց դատարանում զենքի՝ զենքն լինելն էլ չապացուցվեց: Մի հոգին ցուցմունք է տալիս ու ասում, որ եռացված փամփուշտները չեն կրակում, իսկ փորձագետն ասում է՝ կրակում են: Փաստորեն, ես ինձ ընդհանրապես մեղավոր չեմ ճանաչում»,-հայտարարեց նա:
Գալուստ Գրիգորյանն անդրադարձավ գործում որպես ապացույց ներկայացվող իրերին. «Խոհանոցային գրտնակը որպես զենք են ներկայացվում: Եկեք լուրջ վերաբերվենք էլի: Պլաստմասե խողովակը կամ գրտնակը ո՞նց կարող են զենք լինել: Ծիծաղելի է»: Գրիգորյանը վստահեցրեց, որ ինքը Ժիրայր Սեֆիլյանին անգամ չի էլ ճանաչում. «Ես ոչ մի բանում մեղավոր չեմ»:
Խոսեց նաեւ ամբաստանյալներից Սասունիկ Կիրակոսյանը (լուսանկարում)՝ ասելով. «Հավաքվել ենք, գինի ենք խմել, մի պատառ հաց ենք կերել, եւ դա ներկայացվել է, թե լուրջ հեղափոխական գործողություններ ենք ծրագրել: Ամոթ է»:
Լուիզա ՍՈՒՔԻԱՍՅԱՆ
