ՀՀ Սահմանադրական դատարանում այսօր նախատեսված էր Գյումրիում սպանված Ավետիսյանների ընտանիքի իրավահաջորդների դիմումի առնչությամբ որոշման հրապարակումը, սակայն դատարանը որոշել է դիմումի վրա հիմնված գործի քննությունը կարճել: Այս մասին Aravot.am-ին հայտնեց Ավետիսյանների իրավահաջորդների շահերի ներկայացուցիչ, փաստաբան Արամազդ Կիվիրյանը:
Նա դատարանի որոշումն իրավաչափ չի համարում: «Սկզբում մեր դիմումի առնչությամբ որոշման հրապարակման օր նշանակվեց, սակայն հետաձգվեց, իսկ այսօր էլ գործը կարճվեց: Նրան գործելաոճն իրավաչափության մասին չի խոսում»,-նկատեց Արամազդ Կիվիրյանը:
Նա նշեց, որ ՍԴ երեք դատավորներ հատուկ կարծիք են գրել Ավետիսյանների դիմումի վերաբերյալ, որոնց բովանդակությունը փաստաբանը դեռ քննության կառնի: Իսկ ՍԴ-ի՝ Ավետիսյանների դիմումի վրա հիմնված գործը կարճելու որոշումը եւ դրանում մատնանշված պատճառները դեռ պետք է ուսումնասիրել, որից հետո միայն նախանշել Ավետիսյանների իրավահաջորդների հետագա քայլերը: Հիշեցնենք, որ Ավետիսյանների իրավահաջորդները վիճարկում էին որոշակի օրենսդրական նորմերի սահմանադրականության հարցը, քանի որ Քրեական դատավարության օրենսգիրքը չի թույլատրում Ռուսաստանի դաշնությունից գումար պահանջել՝ որպես բարոյական վնասի փոխհատուցում:
Լուիզա ՍՈՒՔԻԱՍՅԱՆ
