Հայաստանի Հանրապետությունում Լեռնային Ղարաբաղի Հանրապետության մշտական ներկայացուցչության խորհրդական-խորհրդատու Գառնիկ Իսագուլյանի կարծիքով, Սերժ Սարգսյանի՝ վարչապետի պաշտոնում առաջադրվելու հարցը Սերժ Սարգսյանը լավագույն կերպով է մեկնաբանել իր հայտարարությամբ:
«Նախագահը նշում է, որ «չի լինելու» և «չի հավակնելու» հասկացողությունները տարբեր իմաստներ ունեն. նա չթաքցրեց, որ հիմա էլ չի հավակնում: Դա ազնիվ և հասկանալի պատասխան էր: Սահմանադրական փոփոխություններից հետո նախագահի հետ հանդիպումներում ես ինքս՝ մարդ, որը մտահոգ է Արցախի, Հայաստանի խնդիրներով, ասել եմ, որ ճիշտ կլինի, որ ինքն առաջինը ստանձնի այս պաշտոնը: Իմ փաստարկը եղել է այն՝ քանի որ Սահմանադրական փոփոխությունները եղել են իրենցից, լավ կլինի, որ առաջինը հենց իրենք փորձարկեն Սահմանադրության աշխատունակությունը»,- այսօր «Տեսակետ» ակումբում ասաց Իսագուլյանը:
Անդրադառնալով Բակո Սահակյանի ԱՄՆ կատարած այցին ՝ բանախոսը նկատեց, որ թեեւ այդպիսի այցեր շատ են եղել, բայց կարեւոր հանդիպում էր. «Իհարկե, շատ կարևոր այց է, բայց թմբկահարելն անտեղի և անիմաստ էր: Բացի այդ, Ադրբեջանի արձագանքը գիտեք՝ ինչ երանգներ ունի իր մեջ: Պետք չէ նախապատվություն տալ և ասել, որ պատմական էր այս այցը: Այս այցերը կարևոր են, բայց վճռական, կարևորագույն նշանակություն չունեն»:
Արփինե ՍԻՄՈՆՅԱՆ
