Լրահոս
Օրվա լրահոսը

Շավարշ Քոչարյան. «Գրեթե անհավանական է, որ ԵՄ անդամ որեւէ երկիր խոչընդոտի Հայաստան-ԵՄ համաձայնագրի վավերացմանը»

Մարտ 22,2018 15:11

Այսօր կառավարության նիստից հետո լրագրողների հետ ճեպազրույցում արտաքին գործերի փոխնախարար Շավարշ Քոչարյանն ասաց, որ գրեթե անհավանական է, որ ԵՄ անդամ որեւէ երկիր խոչընդոտի Հայաստան-ԵՄ համաձայնագրի վավերացմանը:

Ըստ Քոչարյանի, եթե ԵՄ որեւէ պետություն շահագրգիռ չէր, ապա կարող էր խոչընդոտել մինչ համաձայնագրի ստորագրումը, եւ եթե Եվրամիությունը ստորագրել է, սա նշանակում է, որ բոլոր անդամ պետությունների լիակատար համաձայնությունն եղել է:

Համաձայնագիրը Ազգային ժողովը պետք է ապրիլ ամսին վավերացնի, որից հետո, ինչպես ասաց Քոչարյանը, պետք է այդ մասին ծանուցենք Եվրամիությանը: Իսկ ծանուցելուց հետո, ըստ փոխնախարարի, հնարավորություն կա, որ համաձայնագրի որոշակի հատվածներ սկսեն գործել. «Այսինքն՝ դրանից հետո կստանանք հաստատում, եւ առանձին դրույթներ կսկսեն գործել: Ամբողջությամբ ուժի մեջ կմտնի միայն այն պահից, երբ որ վերջին պետությունը ծանուցի, որ ավարտել է վավերացումը: Բնական է, որ իրար հետ կապը կա՝ վիզաների ազատականացման խնդիրը եւ մնացած բոլոր հատվածները»:

Համաձայնագրի վավերացումից հետո որոշ դրույթների ժամանակավոր կիրառումն ավելի դյուրին կդարձնի, ըստ Քոչարյանի, վիզաների ազատականացման ուղղությամբ տարվող բանակցությունները:

Մանրամասն՝ տեսանյութում

Հարցին՝ մտահոգություն չկա՞, որ Հայաստանի արտագաղթը մեծ չափերի կհասնի վիզաների ազատականացումից հետո, Քոչարյանը պատասխանեց. «Վիզաների ազատականացումը սերտորեն կապված է ռեադմիսիայի հետ: Այսինքն՝ եվրոպական պետությունները շահագրգիռ են, որ այդ ազատականացումը չբերի չարաշահումների: Այնպես որ, դրանք իրար հետ շաղկապված հարցեր են»:

Նելլի ԲԱԲԱՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Ամենաընթերցված

Օրացույց
Մարտ 2018
Երկ Երե Չոր Հնգ Ուրբ Շաբ Կիր
« Փետ   Ապր »
 1234
567891011
12131415161718
19202122232425
262728293031