Մարտի 23-ին Ազատության հրապարակում «Հանուն Հայաստան պետության» ճակատի հրավիրված 3-րդ հանրահավաքին Ճակատի անդամ Պետրոս Մակեյանը եւս անդրադարձավ Ժիրայր Սեֆիլյանի ու Գեւորգ Սաֆարյանի դատավարությանը: Նրա ձեւակերպմամբ, ստալինյան ոճով են այլախոհների նկատմամբ գործողություններ իրականացվում: «Հայաստանում չկա արդարադատություն, կա վրեժխնդրություն տղաների նկատմամբ: Դա բացատրվում է մեկ բանով. Ժիրայրի տեսակից վախենում են:
Ժիրայրը բացահայտվեց հողերը հանձնելու մտադրությունը, ինչը չէին կարող մարսել: Ժիրայրենց գործը, Սասնա ծռերի ապստամբությունը, Մարաշի գործը, Շանթի պայքարը, այս բոլորը հետեւանք են մարտի 1-ի… Մարտի 1-ի հանցագործները ազատ թրեւ են գալիս, իսկ Արցախի համար պայքարած տղաները բանտերում են: Սերժ Սարգսյանն ուզում է հողերը հանձնել, դրա համար էլ Ժիրայրի, Սամվել Բաբայանի ու մյուսների նմանները հայտնվել են բանտերում»,-հայտարարեց Պետրոս Մակեյանը:
Նա առաջարկեց Անդրանիկ Քոչարյանին, փաստաբան Սեդա Սաֆարյանին ու բոլոր նրանց, որոնց մոտ կուտակված են մարտի 1-ի փաստերը, հրապարակային դատավարություն կազմակերպել բոլորի աչքի առաջ, եւ վճիռ կայացվի ժողովրդի կողմից:
Նրա խոսքով, պետք է բանտերում «փակվեն» մարտի 1-ի կազմակերպիչները եւ պատասխանատուները. «Սերժ Սարգսյանը որպես մարտի 1-ի շահառու, Ռոբերտ Քոչարյանը, որպես մարտի 1-ի պատասխանատու»:
Գոհար ՀԱԿՈԲՅԱՆ
