Փախլավայի այս տեսակին արաբները «թռչնի բույն» են կոչում, իսկ մենք չգիտես ինչու նախընտրել ենք թարգմանել թուրքերեն տարբերակը` hanım hanimgöbeği` խանումի պորտ:
Շատ արագ, հեշտ եւ համեղ խմորեղեն է: Միջուկը կարող եք պատրաստել ձեր նախընտրած տարբերակով:
Անհրաժեշտ մթերքները
Ֆիլո խմոր- 500 գրամ
Կարագ կամ հալած յուղ- 200 գրամ
Պիստակ կամ ընկույզ-1 բաժակ
Օշարակի համար`
Շաքարավազ- 3 բաժակ
Ջուր-3 բաժակ
Դարչինի փայտիկ-1-2 հատ
Նարինջ կամ կիտրոն- կես հատ
Պատրաստման եղանակը
Առաջին հերթին պետք է ապասառեցնել ֆիլո խմորը, որը վաճառվում է սառեցված վիճակում: Եթե առավոտյան եք պատրաստելու փախլավան, խմորը սառնարանից հանեք երեկոյան: Խմորը պետք է լիովին ապասառեցված լինի, այլապես կփշրվի եւ շատ դժվար կլինի աշխատելը:
Նախ պատրաստում ենք օշարակը: Ջուրն ու շաքարավազը լավ խառնում ենք եւ դնում կրակին, պարբերաբար խառնում ենք: Հենց սկսի եռալը, ավելացնում ենք դարչինի փայտիկն ու կես նարինջը կամ կիտրոնը, որի հյութը կարող եք քամել օշարակի մեջ, կեղեւն էլ թողնել մեջը` բույր տալու համարը: Թողեք եփվի եւս 5-10 րոպե եւ անջատեք:
Հալեցրեք կարագը: Վերցրեք մեկ երկար փայտե փայտիկ: Խանութներում տուփերով վաճառվում են նման փայտիկներ` փոքրիկ բարբեքյուներ պատրաստելու համար:
Անցնենք խմորին: Յուրաքանչյուր հատիկ թխվածքին պետք է մեկ շերտ ֆիլո: Վերցնում ենք խմորի շերտը, վրձինով վրան քսում հալած կարագը, ծալում, վրան էլ քսում կարագ: Ապա մի եզրից դնում ենք փայտիկը եւ խմորը ռուլետի նման փաթաթում ենք փայտիկի վրա: Փաթաթելով հասնում ենք մինչեւ եզրից մոտ 2 սմ եւ կանգ առնում: Երկու կողմերից սեղմում ենք մեր ռուլետը, որ ալիքաձեւ տեսք ստանա, եւ փայտիկը զգուշությամբ հանում ենք միջից: Ապա պտտում ենք ալիքաձեւ ռուլետը, եզրերը իրար վրա բերում, զգուշությամբ իրար կպցնում, իսկ մեջտեղում մնում է խմորի ազատ շերտը, որը դառնում է մեր թռչնաբնի հատակը: Ի դեպ, ֆիլոյի տուփերում վերջին շերտը սովորաբար փշրված է լինում, այդ կտորներից կարող եք ավելացնել «հատակին», որ ավելի ամուր լինի:
Այսպես պատրաստում ենք բոլոր թռչնաբները: Ջեռոցի թավայի հատակին նույնպես յուղ ենք քսում, թռչնաբները շարում ենք մեջը, աշխատելով այնպես անել, որ ազատ տեղ չմնա: Վրաները նույնպես յուղ ենք քսում, եւ դնում ենք 200 աստիճան տաքացրած ջեռոցը` մոտ 15-20 րոպեով, մինչեւ լավ կարմրի: Ավելի լավ է մի քիչ վառ կարմիր լինի, քան թույլ վարդագույն, քանի որ օշարակը վրան լցնելուց հետո` խմորը բավականին փափկելու է, եւ եթե կիսաեփ լինի, համեղ չի լինի:
Երբ թռչնաբները լավ եփվեն, հանեք ջեռոցից, ամեն բնի մեջ լցրեք 1 ճաշի գդալի չափով կոտրած պիստակ կամ ընկույզ, մի քանի վայրկյանով էլ դրեք ջեռոց, որ պիստակներն էլ բովածի բույր ստանան: Եթե, ինձ նման, սիրում եք լավ բոված ընկույզի համը, կարող եք հենց սկզբից ընկույզը կամ պիստակը լցնել բնիկների մեջ եւ թողնել, որ խմորի հետ եփվեն այդ 15-20 րոպեի ընթացքում: Ջեռոցից հանեք եւ անմիջապես օշարակը լցրեք վրան Ընդ որում` լցրեք զգուշությամբ` մի կողքից, որպեսզի պիստակները չթափվեն բնիկներից: Չմոռանամ հիշեցնել, որ կամ ցանցի օգնությամբ լցրեք օշարակը, կամ նախապես միջից հանեք նարնջի կեղեւն ու դարչնի փայտիկը:
Սկզբում ձեզ կթվա, թե օշարակը չափից դուրս շատ է այդքան խմորի համար, քանի որ գրեթե ամբողջությամբ ծածկելու է ձեր թռչնաբները, բայց վստահ եղեք, որ խմորը լրիվ կներծծի օշարակը:
Թողեք մնա մեկ-երկու ժամ եւ կարող եք մատուցել: Նկատի ունեցեք, որ մեկ-երկու օր հետո ավելի համեղ է լինում:
Բարի ախորժակ:
Պատրաստեց Մելանյա Բարսեղյանը
