Ես հաճախ եմ լսել Ապարանի իմ ընկերներին գլուխ գովելիս. մենք այս ունենք, մենք այն ունեինք, մենք որ կայք ունեինք, Ցուկին որտեղ էր: Դե մտածել եմ, խոսքը հավանաբար, հայրենակցական միության նորաստեղծ կայքի մասին է:
Բայց Ապարանի Վարդենիս գյուղում ծնված Տիգրան Պետրոսյանցն ասում է, որ Կայք անունով գյուղը գտնվում է Ապարանի տարածաշրջանում, Ապարան քաղաքից 1,5 կիլոմետր արեւելք, Քասաղ գետի զառիթափ ափին:
Տիգրան Պետրոսյանցը հանձն է առել տպագրել «Ապարանի տարածաշրջանի բնակավայրերը» գիրքը: Ապարաննն ունի 44 բնակավայր, որից երկուսի մասին՝ Վարդենիսի եւ Կայքի հանրագիտարաններն արդեն ընթերցողի սեղանին են:
«Կայքում» զետեղվել են 1006 մարդու կենսագրություն, 800 դիմանկար, նկար, 300 մայրերի մասին տեղեկություններ:
Տիգրան Պետրոսյանցն ասում է, որ եթե Հայաստանի 916 բնակավայրերն ունենան այդպիսի հանրագիտարան, կունենանք այսօրվա ամբողջական Հայաստանի պատկերը:
Իսկ որ շատերիս համար նորույթ էր. Կայք գյուղում ծնվել է աշխարհի 9-րդ չեմպիոնը՝ Տիգրան Պետրոսյանը:
Ռ.Մ.
