Հակահետեւակային 2 ականի պայթյունից 3 վիրավորներից 2-ը ամուսիններ են

Հակահետեւակային 2 ականի պայթյունից 3 վիրավորներից 2-ը ամուսիններ են

2018թ. ապրիլի 12-ին, ժամը 14. 30-ի սահմաններում, Տավուշի մարզի Բերդի տարածաշրջանի Այգեձոր գյուղի երեք բնակիչ վիրավորվել է հակահետեւակային ականների պայթյունից: Այգեձորի բնակիչներ, 36-ամյա Նվեր Սուրենի Ճուղուրյանը, նրա կինը`32-ամյա Աստղիկ Արարատի Պետրոսյանը, նույն գյուղի բնակիչ, 37-ամյա Արամ Սերյոժայի Դալլաքյանը եւ Այգեձորի եւս մի բնակիչ գնացել են գյուղից 5 կմ հեռավորությամբ գտնվող սահմանամերձ տարածք՝ սինդրիկ հավաքելու:

Այգեձոր գյուղից տեղեկացանք, որ վերոհիշյալ անձինք մարտական դիրքերի միջանկյալ տարածքում հայտնվել են շրջանցիկ ճանապարհով, այդ պատճառով սահմանապահ զինծառայողները չեն նկատել նրանց: Առաջինը փշալարով պատված ականապատ դաշտում հայտնվել են ամուսինները`Նվեր Ճուղուրյանը եւ Աստղիկ Պետրոսյանը: Նվերը ձեռքը դրել է փշալարից ներս, գետին, հետեւել է ականի պայթյուն, նրանց օգնության է շտապել Արամ Դալլաքյանը, որը վիրավորվել է հակահետեւակային մեկ այլ ականի պայթյունից: Վիրավորներին օգնության են շտապել սահմանապահ զինծառայողները, նրանց տեղափոխել են Բերդի զինվորական հոսպիտալ:

Զինվորական հոսպիտալի պետ Էդուարդ Գրիգորյանից տեղեկացանք, որ ամպուտացվել են Նվեր Ճուղուրյանի ձեռքը` բազկի ստորին երրորդականից, Աստղիկ Պետրոսյանի եւ Արամ Դալլաքյանի մեկական ոտքը` սրունքի ստորին երրորդականից: Հոսպիտալի պետի խոսքերով`վիրավոր այգեձորցիների վիճակը բավարար է:

Ոսկան ՍԱՐԳՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (1)

Պատասխանել

  1. man vel says:

    այսինքը օրը ցերեկով անցել են վտանգավոր գոտի : Հարց՝ այդ տարածքում մենք բանակային ստորաբաժանում ունենք, ? ինչով են զբաղված? փայտի գործ են անում, թե սահմանն են հսկում?

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք